ខេត្តកណ្តាល ៖ ជនសង្ស័យចំនួន ៤នាក់ ត្រូវបានសមត្ថកិច្ចនៃអធិការដ្ឋាននគរបាលស្រុកកៀនស្វាយ ធ្វើការឃាត់ខ្លួន ខណៈម្នាក់ទៀត គេចខ្លួនបាត់ ពាក់ព័ន្ធករណី លួចម៉ូតូកង់បី , រក្សាទុកនូវអាវុធខុសច្បាប់ (កាំភ្លើងស្នប់កែច្នៃ,ចំពុះទង់ កណ្ដៀវ) និងប្រើប្រាស់នូវសារធាតុញៀនដោយខុសច្បាប់ កាលពីវេលាម៉ោង ៩ និង ៤០នាទីយប់ ថ្ងៃទី១០ ខែកញ្ញា ឆ្នាំ២០២៣ លើផ្លូវក្រវ៉ាត់ក្រុងទី៣ ឋិតក្នុងភូមិពពាលខែ២ ឃុំដីឥដ្ឋ ស្រុកកៀនស្វាយ ខេត្តកណ្តាល។

ជនរងគ្រោះឈ្មោះតាន់ ស៊ីថា ភេទប្រុស អាយុ៤៣ឆ្នាំ ជនជាតិខ្មែរ មុខរបររត់កង់បី មានទីលំនៅភូមិពពាលខែ២ ឃុំដីឥដ្ឋ ស្រុកកៀនស្វាយ ខេត្តកណ្ដាល ។

រីឯជនសង្ស័យរួមមាន ៖

១/ ឈ្មោះចាន់ សុខម៉េង ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិពពាលខែ២ ឃុំដីឥដ្ឋ  ស្រុកកៀនស្វាយ ខេត្តកណ្តាល (ឃាត់ខ្លួន) ។

២/ ឈ្មោះឈុន អេងសុង ភេទ ប្រុស អាយុ២០ឆ្នាំ ជនជាតិខ្មែរ មុខបរមិនពិតប្រាកដ  មានទីលំនៅភូមិ ស្តៅកន្លែង៤ ឃុំដីឥដ្ឋ ស្រុកកៀនស្វាយខេត្តកណ្តាល (ឃាត់ខ្លួន) ។

៣/ ឈ្មោះអៀន ដារ៉ូ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល (ឃាត់ខ្លួន) ។

៤/ឈ្មោះ ឡឹក សុវណ្ណារឹទ្ធ ភេទប្រុស អាយុ២៦ឆ្នាំមានទីលំនៅភូមិស្ដៅកន្លែង ឃុំ ដីឥដ្ឋ ស្រុកកៀនស្វាយ

មុខរបរមិនពិតប្រាកដ(ឃាត់ខ្លួន)មុខសញ្ញាប្រើបាស់គ្រឿងញៀន។

៥/ឈ្មោះចាន់ សុជា ហៅឆាត ភេទប្រុស អាយុ២២ឆ្នាំ ជនជាតិខ្មែរមុខរបរមិនពិត មានទីលំនៅភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល(គេចខ្លួន) ។

ក្នុងនោះ វត្ថុតាងចាប់យករួមមាន៖

១ / កាំភ្លើងស្នប់កែឆ្នៃ ០១ដើម

២/ គ្រាប់ពីដាងកង់ ១៨គ្រាប់ ។

៣/ កណ្តៀវច្រូតស្រូវផ្លែដែក ដងឈើ ប្រវែង៣០សង់ទីម៉ែត្រចំនួន០១ដើម ។

៤/ សម្ភារះប្រើប្រាស់ថ្នាំញៀនមួយចំនួន

៥/ ម៉ូតូកង់បី ០១គ្រឿង(ម៉ូតូម៉ាកស៊ុយសូគីវីវ៉ាសូគុន ពណ៌ខ្មៅ ពាក់ផ្លាកលេខ តាកែវ 1A-7040 និងកន្ទុយកង់បី ពណ៌ស គ្មានផ្លាកលេខ) ។

៦/ ជំពុះទង់កាំភ្លើងAK ប្រវែង៤៣សង់ទីម៉ែត្រ ០១ដើម ។

៧/ ទូរស័ព្ទដៃ០១គ្រឿងម៉ាកOPPO A5s ។

សូមបញ្ជាក់ថា នៅថ្ងៃទី១០ ខែកញ្ញា ឆ្នាំ២០២៣  វេលាម៉ោង០៧និង ៣០នាទី ជនរងគ្រោះបានទុកម៉ូតូកង់បីនៅក្រោមផ្ទះរបស់ខ្លួន ហើយក៏បានដើរទៅផឹកនៅផ្ទះរបស់ឈ្មោះ ខា ភេទប្រុស អាយុ៦០ឆ្នាំ មានទីលំនៅភូមិពពាលខែ២ ឃុំដីឥដ្ឋ ស្រុកកៀនស្វាយ ខេត្តកណ្ដាល ចម្ងាយពីផ្ទះរបស់ខ្លួន១០០ម៉ែត្រ ពេលជនរងគ្រោះផឹកចប់ ក៏បានដើរត្រឡប់មកផ្ទះវិញក៏ឃើញបាត់ម៉ូតូកង់បី។

ភ្លាមនោះជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដីឥដ្ឋ ពេលទទួលបានបណ្ដឹងភ្លាមកម្លាំងនគរបាលប៉ុស្តិ៍ដីឥដ្ឋ សហការជាមួយកម្លាំងប៉ុស្តិ៍នគរបាលរដ្ឋបាលកំពង់ស្វាយ, កម្លាំងផ្នែកប្រឆាំងគ្រឿងញៀន កម្លាំងព្រហ្មទណ្ឌស្រុកកៀនស្វាយ និងកម្លាំងប្រជាការពារ បានធ្វើការចេញល្បាតនិងពួនស្ទាក់ស្វែងរកមុខសញាជនសង្ស័យនិងវត្ថតាងខាងលើ  រហូតមកដល់ផ្លូវក្រវ៉ាត់ក្រុងទី៣ ក៏ឃើញជនសង្ស័យ ឈ្មោះចាន់ សុខម៉េង ភេទប្រុស កំពង់តែឈរនៅជិតកង់បីម្នាក់ឯង ដោយមានការសង្ស័យកម្លាំងសមត្ថកិច្ច បានចុះទៅសួរនាំនិងធ្វើការឆែកឆេរនៅក្នុងម៉ូតូកង់បី បានរកឃើញ អាវុធកែឆ្នៃ(កាំភ្លើងស្នប់) ០១ដើម នឹងគ្រាប់ពីដាងកង់១៨គ្រាប់, ចំពុះទង់០១ដើម, កណ្ដៀវច្រូតស្រូវ០១ដើម នៅក្នុងម៉ូតូកង់បីរបស់ជនសង្ស័យ ចំណែកជនសង្ស័យបីនាក់ទៀតអង្គុយនៅក្នុងរោងក្បែរម៉ូតូកង់បីជាប់ផ្លូវក្រវាត់ក្រុងទី៣។

ពេលនោះកម្លាំងសមត្ថកិច្ចបានបន្តចុះទៅដល់រោងចាំចំការ ស្រាប់តែជនសង្ស័យម្នាក់ទៀតបានរត់គេចខ្លួន រីឯជនសង្ស័យទាំង០៣នាក់ បានឃាត់ខ្លួន យកមកសាកសួរនៅអធិការដ្ឋានស្រុកកៀនស្វាយ ក្រោយពីសាកសួររួចជនសង្ស័យទាំង០៣នាក់

+ឈ្មោះចាន់ សុខម៉េង ភេទប្រុសបានសារភាពថា÷ ចំពោះកាំភ្លើងស្នប់កែច្នៃ, ជំពុះទង់ និងកណ្ដៀវខ្លួនបានធ្វើដោយខ្លួនឯងសម្រាប់ទុកបាញ់សត្វនិងការពារខ្លួន និងធ្លាប់ធ្វើសកម្មភាពលួចចំនួន០៣ លើក÷

-លើកទី១÷ នៅថ្ងៃមិនចាំ ខែឧសភា ឆ្នាំ២០២៣ វេលាម៉ោង ១៥:០០នាទី ខ្លួនបានចូលទៅលួចចេកនៅក្នុងដីចម្ការរបស់ឈ្មោះធូ ភេទស្រី អាយុ៤៧ឆ្នាំ ជនជាតិខ្មែរ មានទីលំនៅភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្ដាលបានចេកចំនួន០៦ស្ទងលក់បានប្រាក់ចំនួន៣៦០០០រៀល និងធ្លាប់ប្រើប្រាស់គ្រឿងញៀនអស់រយៈពេលមួយឆ្នាំហើយ ។

-លើកទី ២÷ នៅថ្ងៃមិនចាំខែមិថុនាឆ្នាំ២០២៣ វេលាម៉ោង ១៤:៣០ នាទី ចូលទៅលួចផ្លែដូងនៅក្នុងដីចំការមិនស្គាល់ឈ្មោះបានផ្លែដូងចំនួន០២ធ្លាយ លក់បានប្រាក់ចំនួន ២៥០០០ រៀល ។

-លើកទី៣÷ នៅថ្ងៃទី១០ ខែកញ្ញាឆ្នាំ២០២៣ វេលាម៉ោង២១:៤០ នាទី បានចូលទៅក្រោមផ្ទះរបស់ជនរងគ្រោះលួចយកម៉ូតូកង់បីជិះមកប្រើប្រាស់គ្រឿងញៀននិងចេញធ្វើសកម្មភាពលួច ។

+ឈ្មោះឈុន អេងសុង ភេទប្រុស បានសារភាពថាខ្លួនធ្លាប់ធ្វើសកម្មភាពលួចជាមួយឈ្មោះចាន់ សុខម៉េង ភេទប្រុសចំនួន០៣ លើកដូចគ្នានឹងធ្លាប់ប្រើប្រាស់គ្រឿងញៀនអស់រយៈពេល០២ឆ្នាំមកហើយ។

+ឈ្មោះអៀន ដារ៉ូ ភេទប្រុស បានសារភាពថាខ្លួនបានដើរជាមួយឈ្មោះចាន់ សុខម៉េង ភេទប្រុសនិងឈ្មោះឈុន អេងសុង ភេទប្រុសហើយពេលដែលលួចបានឈ្មោះឈុន អេងសុង និងឈ្មោះចាន់ សុខម៉េង បានប្រើខ្លួនឲ្យយកផ្លែចេកនិងផ្លែដូងយកទៅលក់ដើម្បីយកប្រាក់មកប្រើប្រាស់គ្រឿងញៀន ។

ចំណែកឈ្មោះ ឡឹក សុវណ្ណារឹទ្ធិ បានសារភាពថា ខ្លួនពិតជាបានជិះម៉ូតូទៅរកក្រុមខ្លួនដើម្បីប្រើប្រាស់សារធាតុញៀនប្រាកដមែន ។

ក្រោយពីសមត្ថកិច្ចសួរនាំរួចកម្លាំងនគរបាលព្រហ្មទណ្ឌស្រុកកៀនស្វាយ បានសុំគោលការណ៍មេឃាត់ខ្លួនជនសង្ស័យទាំង៤នាក់ជាបណ្ដោះអាសន្ននៅអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងតាមនីតិវិធីច្បាប់ ៕ អែល វិចិត្រ