រាជធានីភ្នំពេញ ៖ ជនសង្ស័យជាបុរសវ័យចំណាស់ម្នាក់ ត្រូវសមត្ថកិច្ចនៃអធិការដ្ឋាននគរបាលខណ្ឌដូនពេញ ធ្វើការឃាត់ខ្លួន បញ្ជូនទៅតុលាការ ក្រោយ យកចំពាមកៅស៊ូបាញ់ក្មេងស្រីបណ្តាលឲ្យរបួសក្រោយភ្នែកខាងធ្វេង ខណៈកាមេរ៉ាសុវត្ថិភាព ថតជាប់សកម្មភាពទាំងស្រុង ដោយបង្ហាញនេះ នេះមិនមែនជាការបាញ់ច្រឡំ នោះទេ តែព្យាយាម បាញ់រហូតដល់ ៣ដងទៅលើក្មេងស្រីរងគ្រោះ លុះលើកទី៣នោះ ក៏ត្រូវចំមុខក្មេងតែម្តង សំណាងណស់មិនត្រូវភ្នែកក្មេង ចុះបើត្រូវគ្រាប់ភ្នែកខ្វាក់ តើអនាគតក្មេងស្រីខាងលើ ទៅជាយ៉ាងណា? ។

ហេតុការណ៍នេះបានកើតឡើងកាលពីវេលាម៉ោង ៦ និង២៧នាទី យប់ថ្ងៃទី១១ ខែកញ្ញា ឆ្នាំ២០២៣ នៅចំណុចមុខផ្ទះលេខ៤ ផ្លូវបេតុង ភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ ។

តាមរបាយការណ៍ពីសមត្ថកិច្ចបានឲ្យដឹងថា ជនសង្ស័យខាងលើ មានឈ្មោះ ង្វៀង យ៉ាំងងី ហៅ ហេង ផល្លា ភេទប្រុស អាយុ៧៥ឆ្នាំ ជនជាតិវៀតណាម មុខរបរ នៅផ្ទះ ស្នាក់នៅផ្ទះលេខ៤ ផ្លូវជាតិលេខ៥ ភូមិ១៦ សង្កាត់ស្រះចក ដកហូតបាន ជំពាមកៅស៊ូ ដងឈើមួយ និង គ្រាប់សំណរចំនួន៣។

ចំណែកក្មេងស្រីរងគ្រោះ សួន វ៉ាន់នី ភេទស្រី អាយុ៦ឆ្នាំ រងរបួសចំថ្ពល់ខាងធ្វេងក្រោមភ្នែកហូរឈាម ។

របាយការណ៍ដដែលបន្តថា មុនពេលកើតហេតុ ថ្ងៃទី១១ ខែកញ្ញា ឆ្នាំ២០២៣ វេលាម៉ោង៦ និង២៧នាទី ក្មេងស្រីឈ្មោះ សួន វ៉ាន់នី អាយុ៦ឆ្នាំ បានជិះកង់ស្គីលេងនៅលើផ្លូវបេតុង ក្នុងភូមិ ទៅវិញទៅមក ស្រាប់តែក្មេងស្រីស្រែកយំភ្លាមៗខ្ទប់មុខថាឈឺណាស់ៗ រត់ទៅប្រាប់ឪពុកឈ្មោះ តាំង សុវណ្ណ ក្រោយពីបានឃើញសភាពកូនស្រីមានរបួសហូរឈាម នៅផ្ទៃមុខក្រោមភ្នែកខាងឆ្វេងដូច្នោះឪពុកក៏សួររកអ្នកណាគប់ ឫអ្នកណាបាញ់ត្រូវកូនស្រីគាត់តែរកមិនឃើញនិងនាំទៅព្យាបាល ។ លុះដល់ព្រឹកថ្ងៃទី១២ ខែកញ្ញា ឆ្នាំ២០២៣ វេលាម៉ោង៨ ឪពុកជនរងគ្រោះបានមកដាក់ពាក្យបណ្តឹងនៅប៉ុស្តិ៍នគររដ្ឋបាលស្រះចក ។

ភ្លាមនោះសមត្ថកិច្ចបានចុះស្រាវជ្រាវដល់កន្លែងកើតហេតុ ដោយឆែកកាមេរ៉ាសុវត្ថិភាព រកឃើញៀនសង្ស័យឈ្មោះ ង្វៀង យាំងងី ភេទប្រុស អាយុ៧៥ឆ្នាំ ជនជាតិវៀតណាម ដែលអង្គុយក្នុងផ្ទះជាអ្នកទាញជំពាមកៅស៊ូ បាញ់មកលើក្មេងស្រីរងគ្រោះ។

ក្រោយពីកំណាត់អត្តសញ្ញាណបានសមត្ថកិច្ចបានធ្វើការ

ឃាត់ខ្លួនជនសង្ស័យខាងលើនេះ នៅចំណុចមុខផ្ទះលេខ៤ ផ្លូវជាតិលេខ៥ ភូមិ១៦ សង្កាត់ស្រះចក រួមនឹងវត្ថុតាង នាំមកប៉ុស្តិ៍នគរបាលរដ្ឋបាលស្រះចក។

ពេលនេះជនសង្ស័យខាងលើ ត្រូវបានសមត្ថកិច្ចធ្វើការឃាត់ខ្លួននៅអធិការដ្ឋាននគរបាលខណ្ឌដូនពេញ ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់ តុលាការ ចាត់ការតាមច្បាប់ ៕