រាជធានីភ្នំពេញ ៖ បុរសម្នាក់ បើករថយន្តព្រូសមួយគ្រឿង តាមបណ្ដោយមហាវិថីឈ្នះឈ្នះ ទៅបុកនឹងរង្វង់មូល រួចក៏ហោះទៅបុកនឹងជញ្ជាំងដីឡូត៍ប្រជាពលរដ្ឋ បណ្ដាលឲ្យក្រឡាប់ជាច្រើនជុំ រងការខូចខាតយ៉ាងដំណំ កាលពីយប់ថ្ងៃទី១៣ ខែកញ្ញា ឆ្នាំ២០២៣ នៅតាមបណ្ដោយមហាវិថីឈ្នះឈ្នះ ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញបុរសជនជាតិបរទេសម្នាក់ បានបើករថយន្តម៉ាកព្រូស មួយគ្រឿង ពណ៌ស ដែលពាក់ស្លាកលេខ ភ្នំពេញ 2AW 3224 ធ្វើដំណើរតាមបណ្ដោយមហាវិថីឈ្នះឈ្នះ ក្នុងទិសដៅពីកើតមកលិច មកដល់ចំណុចកើតហេតុ រថយន្តក៏បានបើកទៅបុកនឹងរង្វង់មូលពេញមួយទំហឹង រួចក៏បានហោះទៅបុកនឹងជញ្ជាំងដីឡូត៍ប្រជាពលរដ្ឋ បណ្ដាលឲ្យរថយន្តក្រឡាប់ផ្ងារជើងឡើងលើ រងការខូចខាតយ៉ាងដំណំ។
ក្រោយកើតហេតុ សមត្ថកិច្ចក៏បានទំនាក់ទំនងឲ្យសមត្ថកិច្ចជំនាញចរាចរណ៍ របស់អធិការដ្ឋាននគរបាលខណ្ឌជ្រោយចង្វារ ធ្វើការវាស់វែង យករថយន្តនិងអ្នកបើកបរ ទៅអធិការនគរបាលខណ្ឌជ្រោយចង្វារ ដើម្បីចាត់ការតាមច្បាប់ ៕ Mrr Ka
