ខេត្តកំពង់ស្ពឺ៖ ក្មេងទំនើងកំពង់ស្ពឺ បង្ហោះម៉ូតូលើផ្លូវជាតិលេខ៤ ថ្ងៃទី១៣ ខែកញ្ញា ឆ្នាំ២០២៣ ក្រោយទទួលបានព័ត៌មានតាមបណ្ដាញសង្គម
ហ្វេសប៊ុក លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានបញ្ជាឲ្យជំនាញធ្វើការស្រាវជ្រាវរហូតដឹងនិងស្គាល់អត្ដសញ្ញាណ
ក្រុមក្មេងទំនើងបង្ហោះម៉ូតូ ខាងលើ។ នេះបើយោងតាមផេក ស្នងការដ្ឋាននគរបាលខេត្តកំពង់ស្ពឺ ។
ជាក់ស្ដែងដោយបានកិច្ចសហការពីកម្លាំងនគរបាលមូលដ្ឋានស្រុកសំរោងទង ប៉ុស្ដិ៍នគរបាលរដ្ឋបាល ជំនាញព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ដបានធ្វើការនាំក្រុមក្មេងទំនើងរួមជាមួយម៉ូតូយកមកធ្វើការសាកសួរ ។
ជាលទ្ធផល ក្រុមក្មេងដែលសមត្ថកិច្ចនគរបាលឃាត់មានចំនួន ០៤នាក់ , ម៉ូតូចំនួន ០២គ្រឿង ជាមធ្យោបាយប្រព្រឹត្ដកាលពីថៃ្ងទី ១២ កញ្ញា ២០២៣ បន្ទាប់ពីមិនបានចូលសាលា នៅតាមបណ្ដោយផ្លូវជាតិលេខ ៤ ក្នុងទិសដៅពីលិចទៅទិសខាងកើត (ទីរួមខេត្ដ ស្រុកសំរោងទង) ។
ក្រោយការសាកសួរ បានឆ្លើយទទួលស្គាល់ថាពិតជាបានធ្វើការបង្ហោះម៉ូតូ និងថតរូបវីដេអូ បង្ហោះតាមបណ្ដាញសង្គម ហ្វេសប៊ុក ចែករំលែកជាសាធារណៈ ដោយចង់បង្អួតដល់អ្នកដទៃថាខ្លួនអស្ចារ្យ ។
បច្ចុប្បន្នក្រុមក្មេងទំនើងត្រូវបានធ្វើកិច្ចសន្យានិងអញ្ជើញមាតាបិតា មកទទួលដឹងឮបញ្ឍប់សកម្មភាពដូចខាងលើ ក្នុងករណីមិនរាងចាល សមត្ថកិច្ចនិងអនុវត្ដផ្លូវច្បាប់៕
