រាជធានីភ្នំពេញ ៖ ពិតជាសាហាវណាស់ សមត្ថកិច្ចនៃអធិការដ្ឋាននគរបាលខណ្ឌច្បារអំពៅ ធ្វើការឃាត់ខ្លួនជនសង្ស័យម្នាក់ ពាក់ព័ន្ធករណី ឃាតកម្មគិតទុកជាមុន បើករថយន្តបុកសម្លាប់ ស្ត្រីម្នាក់ យ៉ាងរន្ធត់ កាលពីវេលាម៉ោង ៤និង ៤២នាទី ថ្ងៃទី៩ ខែកញ្ញា ឆ្នាំ២០២៣ នៅចំណុច នៅមុខវត្តឬស្សីស្រស់ ផ្លូវបេតុង ភូមិ កោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ។

តាមរបាយការណ៍ពីសមត្ថកិច្ច ដែលក្រុមការងារTVFB ទទួលបាន បានឲ្យដឹងថា ដោយមានការចង្អុលណែនាំពី ឯកឧត្តម អគ្គស្នងការរង និងជាស្នងការនគរបាលរាជធានីភ្នំពេញ និងការបញ្ជាដឹកនាំដោយលោកស្នងការរងទទួលផែនការងារនគរបាលព្រហ្មទណ្ម សមត្ថកិច្ចជំនាញ អធិការដ្ឋាននគរបាលខណ្ឌច្បារអំពៅ សហការជាមួយការិយាល័យនគរបាលបច្ចេកទេស និងវិទ្យាសាស្រ្ត នៃស្នងការដ្ឋាននគរបាលរាជធានី ភ្នំពេញ បានធ្វើការស្រាវជ្រាវបង្រ្កាប ពាក់ព័ន្ធនឹងករណី៖ ឃាតកម្មគិតទុកជាមុន (បើករថយន្តបុកបណ្តាលឲ្យស្លាប់) ទៅលើជនរងគ្រោះឈ្មោះ ព្រុំ អ៊ាង ភេទ ស្រី អាយុ ៦៤ ឆ្នាំ ជនជាតិ ខ្មែរ មុខរបរ លក់ដូរ ស្នាក់នៅភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ។

ក្នុងករណីនេះ សមត្ថកិច្ចជំនាញ បានធ្វើការឃាត់ខ្លួន ជនសង្ស័យឈ្មោះ សូត្រ សិទ្ធី ភេទ ប្រុស អាយុ ៥៣ ឆ្នាំ ជនជាតិ ខ្មែរ តួនាទី នាយរងការិយាល័យភស្តុភារ និងហិរញ្ញវត្ថុ នៃអង្គភាពអន្តរាគមន៍ ស្នាក់នៅផ្ទះលេខ១៥F៨ ផ្លូវបេតុង ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។

ពេលនេះ ជនសង្ស័យខាងលើ សមត្ថកិច្ចជំនាញ កសាងសំណុំរឿង បញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី ៕ អែល មេសា