រាជធានីភ្នំពេញ ៖ ពិតជារន្ធត់ណាស់ វីដេអូកាមេរ៉ាសុវត្ថិភាព បង្ហាញហេតុការណ៍ទាំងស្រុង ម៉ូតូមួយគ្រឿង កំពុងជិះលឿន រថយន្តមួយគ្រឿងទៀតបត់ឆ្លង បុកលាន់ដូចរន្ទះឭសូរតែផាំង ផ្លោងស្លាប់អ្នកជិះម៉ូតូ បែកក្បាលស្លាប់យ៉ាងរន្ធត់បំផុតក្នុងថ្លុកឈាម កាលពីវេលាម៉ោង ២រសៀល ថ្ងៃទី២០ ខែកញ្ញា ឆ្នាំ២០២៣ ត្រង់ចំណុចខាងត្បូងសាលាអនុវិទ្យាល័យព្រៃវែង ផ្លូវបេតុងព្រៃស ស្ថិតនៅក្នុងភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ ។

តាមរបាយការណ៍ពីសមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តម៉ាក LEXUS NX200T ពណ៌ប្រផេះ ពាក់ផ្លាកលេខ ភ្នំពេញ 2BP.7833 បើកបរដោយអ្នកមិនស្គាល់អត្តសញ្ញាណ ទិសដៅពីជើងទៅត្បូង លុះដល់ចំណុចកើតហេតុ រថយន្តបានបត់ឆ្លងផ្លូវ ស្រាប់តែមានម៉ូតូមួយគ្រឿងទៀត ម៉ាក HONDA C125 ពណ៌ខ្មៅ ពាក់ផ្លាកលេខ តាកែវ 1AB.0403 បើកបរដោយឈ្មោះ នៅ វិឆ្ឆិកា ភេទប្រុស អាយុ១៨ឆ្នាំ មុខរបរកម្មករសំណង់ មានទីលំនៅភូមិរកាខ្ពស់ ឃុំត្រពាំងសាប ស្រុកបាទី ខេត្តតាកែវ ជិះស្របទិសគ្នា កំពុងលឿន បុកចំចំហៀងក្បាលរថយន្តខាងមុខ លាន់ដូចរន្ទះឭសូរតែផាំង ផ្លោងស្លាប់អ្នកជិះម៉ូតូ បែកក្បាលស្លាប់យ៉ាងរន្ធត់បំផុតក្នុងថ្លុកឈាម រួចអ្នកបើកបរថយន្តប្រញាប់ចុះពីលើរថយន្តគេចទៅបាត់ សល់តែរថយន្តប៉ុណ្ណោះ ។

ពេលនេះ សពត្រូវបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តនិងម៉ូតូត្រូវបានសមត្ថកិច្ច យកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលក្រោយតាមច្បាប់បន្តទៀត ៕ អែល វិចិត្រ