រាជធានីភ្នំពេញ ៖ ស្ត្រីម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈកំពុងជិះម៉ូតូ ត្រូវបានរថយន្តឡុងគ្រឺស័រមួយគ្រឿងទៀត មកបុកពេញទំហឹង អូសម៉ូតូជាប់ពីក្រោមរថយន្ត បង្កការភ្ញាក់ផ្អើល កាលពីវេលាម៉ោង ៨និង៣០នាទីព្រឹក ថ្ងៃទី ២២ ខែកញ្ញា ឆ្នាំ២០២៣ នៅតាមបណ្ដោយផ្លូវមាត់ទន្លេ ស្ថិតក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញ រថយន្ត ឡង់គ្រឺស័រ មួយគ្រឿង បើកបរដោយបុរសម្នាក់ មានវ័យប្រមាណ ៥០ឆ្នាំ ក្នុងទិសដៅពីជើងទៅត្បូង តាមបណ្តោយផ្លូវខាងលើ លុះដល់ចំណុចកើតហេតុ សង្ស័យងោកមួយភាំង ក៏រេចង្កូតមកបុកម៉ូតូម៉ាក សង់សេ១២៥ ពណ៌ខ្មៅជិះដោយស្ត្រីម្នាក់ ក្នុងទិសដៅបញ្ច្រាសទិសគ្នាពីត្បូងជើង ខ្ទាតស្ត្រីអ្នកជិះម៉ូតូចេញ រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។ ខណៈម៉ូតូវិញ អូសជាប់ពីក្រោមរថយន្តរងការខូចខាតយ៉ាងដំណំ ។

ក្រោយកើតហេតុសមត្ថកិច្ចប៉ុស្តិ៍ផ្សារកណ្តាលទី១ និងនគរបាលចរាចរណ៍ខណ្ឌដូនពេញ បានធ្វើការវាស់វែង យកម៉ូតូនិងរថយន្តអែបខាង ចៀសវាងបង្កការកកស្ទះ និងប្រគល់ឲ្យនគរបាលចរាចរណ៍ក្រុង យកទាំងរថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលក្រោយបន្តទៀត ៕ អែល វិចិត្រ