ខេត្តកណ្តាល ៖ ដោយមានការណែនាំពីលោក ឡូវ សុខសាន អភិបាលនិងជាប្រធានគណៈបញ្ជាការឯកភាពរដ្ឋបាលស្រុកកៀនស្វាយ អនុវត្តន៍ផែនការ និងការអនុវត្តន៍លើ គោលនយោបាយភូមិ ឃុំ មានសុវត្ថិភាព នៅថ្ងៃទី២១ ខែកញ្ញា ឆ្នាំ២០២៣ បានឃាត់ខ្លួនក្មេងទំនើង ៤នាក់ គ្នា២ម៉ូតូ ក្រោយបានបង្ហោះម៉ូតូយ៉ាងអណាធិបតេយ្យ កាលពីវេលាម៉ោង ៣និង ៤០នាទី រសៀលថ្ងៃទី១៧ ខែកញ្ញា ឆ្នាំ២០២៣ លើផ្លូវក្រវ៉ាត់ក្រុងទី៣ ក្នុងភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ ខេត្តកណ្តាល ។ នេះបើយោងតាមរបាយការណ៍​និងផេក អធិការដ្ឋាននគរបាលស្រុកកៀនស្វាយ ។

សមត្ថកិច្ចបានឲ្យដឹងថា ក្មេងទំនើងមាន៤នាក់ ម៉ូតូ២គ្រឿង រួមមាន ៖

១/ ឈ្មោះសន វណ្ណារ័ត្ន ភេទប្រុស អាយុ១៦ឆ្នាំ មុខរបររត់តុការ មានទីលំនៅភូមិកណ្តាលកោះ សង្កាត់កអន្លង់ចិន ក្រុងតាខ្មៅ ខេត្តកណ្តាល (ឃាត់ខ្លួន) ។

២/ ឈ្មោះខុន ប៊ុនតុង ភេទប្រុស អាយុ១៧ឆ្នាំ មុខរបររត់តុការ មានទីលំនៅភូមិកណ្តាលកោះ សង្កាត់កអន្លង់ចិន ក្រុងតាខ្មៅ ខេត្តកណ្តាល (ឃាត់ខ្លួន) ។

៣/ ឈ្មោះសាត សុភា ភេទប្រុសអាយុ១៨ឆ្នាំ មុខរបររត់តុការ មានទីលំនៅភូមិកណ្តាលកោះ សង្កាត់កោះអន្លង់ចិន ក្រុងតាខ្មៅ ខេត្តកណ្ដាល (ឃាត់ខ្លួន) ម្ចាស់ម៉ូតូ ។

៤/ ឈ្មោះឃាង សៀកហុង ភេទប្រុស អាយុ១៦ឆ្នាំ មុខរបររត់តុការ មានទីលំនៅភូមិកណ្តាលកោះ សង្កាត់កអន្លង់ចិន ក្រុងតាខ្មៅ ខេត្តកណ្ដាល (ឃាត់ខ្លួន) ម្ចាស់ម៉ូតូដែលបង្ហោះ ។

ក្នុងនោះវត្ថុតាងចាប់យករួមមាន ៖ ម៉ូតូចំនួន២គ្រឿង (-ម៉ាកហុងដា សេ១២៥ ពណ៌ខ្មៅ ផលិតឆ្នាំ២០២១ ពាក់ស្លាកលេខ ភ្នំពេញ 1AL-7591, -ម៉ាកហុងដា សេ១២៥ ពណ៌ក្រហម ផលិតឆ្នាំ២០២៣ ពាក់ស្លាកលេខ កណ្តាល 1AR-5914 ) ។

មុននឹងឈានដល់ការឃាត់ខ្លួនក្មេងទំនើងខាងលើ សមត្ថកិច្ចបានឃើញបណ្ដាញសង្គម Facebook របស់ឈ្មោះHeng TiNo ភេទប្រុស បានបង្ហោះវីដេអូ ដែលពួកខ្លួនបានបង្ហោះម៉ូតូ ពេលនោះកម្លាំងនគរបាលយុត្តិធម៌ស្រុកកៀនស្វាយ បានធ្វើការស្រាវជ្រាវ និងតាមរកក្មេងទំនើងទាំង៤នាក់ ដែលបានបង្ហោះម៉ូតូ កាលពីថ្ងៃទី១៧ ខែកញ្ញា ឆ្នាំ២០២៣ វេលាម៉ោង១៥ និង៤០នាទី កន្លងទៅ រហូតបានជួបនូវផ្លូវក្រវ៉ាត់ក្រុងទី៣ ពេលនោះកម្លាំងព្រហ្មទណ្ឌស្រុកកៀនស្វាយ បានធ្វើការឃាត់ខ្លួនក្មេងទំនើងបង្ហោះម៉ូតូបានម្នាក់ យកមកសួរនាំ និងបន្តយកបក្ខពួកបាន៣នាក់ទៀត ។

-ឈ្មោះឃាង សៀវហុង ភេទប្រុស បានសារភាពថា ខ្លួនរួមជាមួយនឹងមិត្តភក្កិ៣នាក់ទៀត បាននាំគ្នាជិះម៉ូតូ២គ្រឿង ទៅផ្សារទំនើបអ៊ីអន ដើម្បីដើរលេង រហូតដល់ម៉ោង២រសៀល ពួកខ្លួនទាំង៤នាក់បាននាំគ្នាជិះម៉ូតូត្រឡប់មកវិញសំដៅទៅតូបលក់កាហ្វេមួយកន្លែង នៅភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ ខេត្តកណ្ដាល រួចក៏នាំគ្នាអង្គុយផឹកកាហ្វេរហូតដល់ម៉ោង៣និង ៤០ នាទី ទើបឈ្មោះ ខុន ប៊ូនតុង ភេទប្រុស បានជិះម៉ូតូមួយគ្រឿងម៉ាកហុងដាសេ១២៥ ពណ៌ក្រហម ផលិតថ្នាំ២០២៣ ពាក់ស្លាកលេខ កណ្ដាល 1AR-5914 ឌុបឈ្មោះឃាង សៀវហុង ភេទប្រុស រួចក៏បានបង្ហោះម៉ូតូបានចម្ងាយប្រហែល១០០០ម៉ែត្រ ក៏ជិះត្រឡប់មកកន្លែងតូបលក់កាហ្វេវិញបន្ទាប់មកពួកខ្លួនទាំង០៤នាក់ បានជិះម៉ូតូត្រឡប់ទៅផ្ទះវិញហើយក៏បង្ហោះម៉ូតូម្ដងទៀត ។

-ឈ្មោះស៊ន វណ្ណារ័ត្ន ភេទប្រុស បានសារភាពថា÷ ខ្លួនមិនបានបង្ហោះម៉ូតូទេ តែខ្លួនបានជិះម៉ូតូអមជាមួយនិងមិត្តភក្តិដែលកំពុងបង្ហោះម៉ូតូ ។

-ឈ្មោះសាត សុភា ភេទប្រុស បានសារភាពថាខ្លួនមិនបានបង្ហោះទេខ្លួនរួមជាមួយនឹងឈ្មោះសន វណ្ណារ័ត្ន ភេទប្រុស គ្រាន់តែជិះម៉ូតូអមជាមួយនឹងមិត្តភក្តិដែលកំពុងបង្ហោះម៉ូតូនោះ ។

-ឈ្មោះខុន ប៊ុនតុង ភេទប្រុស បានសារភាពថា÷ ខ្លួនបានយកម៉ូតូរបស់ឈ្មោះឃាង សៀកហុង ភេទប្រុស យកទៅជិះបង្ហោះបានចម្ងាយប្រហែល១០០០ម៉ែត្រ នៅតាមផ្លូវក្រវ៉ាត់ក្រុងទី៣ ដោយឈ្មោះឃាង សៀវហុង ភេទប្រុស អង្គុយនៅពីក្រោយ ដើម្បីសង្កត់ម៉ូតូឲ្យបាស់ឡើង ។

ក្រោយធ្វើការឃាត់ខ្លួនបានហើយនោះ សមត្ថកិច្ចបានធ្វើការអប់រំ ធ្វើកិច្ចសន្យា ជាលាយលក្ខអក្សរ ឲ្យបញ្ឈប់សកម្មភាពទាំងនេះ ដោយមានឪពុកម្តាយ មកធានាយកទៅអប់រំបន្ត ៕ អែល វិចិត្រ