រាជធានីភ្នំពេញ ៖ អាឡូប៉ា អាបងជិះបុកឡានគេប៉ា!!! យុវជនម្នាក់ ជិះម៉ូតូទៅបុកគូទរថយន្តកុងតឺន័រពីក្រោយ ពេញមួយទំហឹងបណ្ដាលឲ្យ ស្លាប់បាត់បង់ជីវិតភ្លាមៗ នៅត្រង់ចំណុចកើតហេតុ តាមបណ្ដោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ វេលាម៉ោង១០យប់ ត្រូវនឹងថ្ងៃទី២៤ ខែកញ្ញា ឆ្នាំ២០២៣។

តាមប្រភពព័ត៌មាន ពីប្រជាពលរដ្ឋ បានអោយដឹងថា មុនពេលកើតហេតុការណ៍ គេឃើញរថយន្ត កុងតឺន័រសណ្ដោងរម៉ក ដែលពាក់ស្លាកលេខ ភ្នំពេញ 3E-7255 ធ្វើដំណើរតាមបណ្ដោយផ្លូវជាតិលេខ៤ ពីលិចទៅកើត លុះមកដល់ត្រង់ចំណុចកើតហេតុ រថយន្តក៏បានឈប់ ដោយមិនដឹងថាឈប់រង់ចាំភ្លើងស្តុប ឬខូចរថយន្តនោះទេ ដោយឃើញតៃកុងរថយន្តចុះមកដើរមើលរថយន្ត២-៣ជុំ ពេលនោះក៏ឃើញមានបុរសម្នាក់ ជិះម៉ូតូហុងដាឌ្រីមសង់C 125 មួយគ្រឿង ដែលពាក់ស្លាកលខ ពោធិ៍សាត់ 1B-7757 ធ្វើដំណើរស្របទិសគ្នា មកពីក្រោយ ក្នុងល្បឿនលឿន ក៏បានជ្រុល បុករថយន្តកុងតឺន័រដឹកថ្មពីក្រោយពេញទំហឹង បណ្ដាលឲ្យបាក់ក និងបែកក្បាលស្លាប់នៅក្នុងថ្លុកឈាមយ៉ាងអាណោចអាធ័ម។

ភ្លាមនោះតៃកុងរថយន្តឃើញសភាពមិនស្រួល ក៏បានរត់គេខ្លួនចេញពីកន្លែងកើតហេតុបាត់។

សមត្ថកិច្ចបានឲ្យដឹងថា សពជនរងគ្រោះមានឈ្មោះ ម៉េងហ៊ុយ ភេទប្រុស អាយុ ២៣ ឆ្នាំ មុខរបរជួយលក់គ្រឿងបន្លាស់រថយន្តឲ្យគេមួយកន្លែង មានស្រុកកំណើត ភូមិទី១ ឃុំព្រែកអាជី ស្រុកក្រូចឆ្មា ខេត្តកំពង់ចាម។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញមកធ្វើការវាស់វែង យករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការរដ្ឋាននគបាលរាជធានីភ្នំពេញ រង់ចាំធ្វើការដោះស្រាយគ្នានៅពីក្រោយទៀតតាមច្បាប់ និងប្រគល់សពឲ្យសាច់ញាតិ យកទៅធ្វើបុណ្យតាមប្រពៃណី៕ Mrr Ka