ខេត្តបាត់ដំបង ៖ មានករណី​ឃាតកម្មមួយបានកើតឡើង ដោយជនសង្ស័យម្នាក់ បានយកពូថៅ កាប់ប្រហារ បុរសម្នាក់ទៀត ស្លាប់យ៉ាងរន្ធត់ កាលពីវេលាម៉ោង ១១និង៣០នាទី​ ថ្ងៃទី២៣ ខែកញ្ញា ឆ្នាំ២០២៣ នៅចំណុចក្រុមទី០៩ ភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង។ នេះបើយោងតាមផេក អគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា ជនសង្ស័យម្នាក់ឈ្មោះ ប្រាក់ សុខណា ភេទប្រុស អាយុ៣៦ឆ្នាំ (ជនវិបល្លាសស្មារតី) មានទីលំនៅភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង បានធ្វើសកម្មភាពយកពូថៅកាប់ទៅលើជនរងគ្រោះម្នាក់ឈ្មោះ កង ស៊ីណាត់ ភេទប្រុស អាយុ ៥៨ឆ្នាំ មានទីលំនៅភូមិភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង បណ្ដាលអោយរងរបួសត្រង់ ចុងភ្នែកស្ដាំ ដល់គុំត្រចៀក ខាងស្ដាំ ០១កន្លែង និងរបួសត្រង់ ឆ្អឹងជំនីផុត ០១កន្លែង បណ្ដាលអោយរងរបួសធ្ងន់រហូតដល់ស្លាប់។

ក្រោយទទួលព័ត៌មាន ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចយោបល់លោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ កម្លាំងអធិការដ្ឋាននគរបាលស្រុកសង្កែ សហការជាមួយប៉ុស្តិ៍នគរបាលរដ្ឋបាល នៃអធិការដ្ឋានស្រុកសង្កែ ដឹងនាំដោយលោកវរសេនីយ៍ឯក ទោ យុត តុងហូ អធិការនគរបាលស្រុកសង្កែ បានចុះធ្វើការបង្ក្រាបឃាត់ខ្លួនបានជនសង្ស័យបានម្នាក់ឈ្មោះ​ ប្រាក់ សុខណា មកកាន់អធិការដ្ឋាននគរបាលស្រុកសង្កែ ដើម្បីធ្វើការសាកសួរ ក្រោយពីសាកសួជនសង្ស័យបានសារភាពថាពិតជាបានធ្វើសកម្មភាពប្រើប្រាស់យកពូថៅកាប់ទៅលើជនរងគ្រោះ ពិតប្រាកដមែន។

សមត្ថកិច្ចបានបញ្ជាក់អោយដឹងថា ជនសង្ស័យជាមនុស្ស (វិបល្លាសស្មារតី)។ ក្នុងនោះ វត្ថុតាងដកហូតបានមាន: ពូថៅចំនួន ០១ដើម។

ករណីនេះ​​ ជនសង្ស័យខាងលើត្រូវសមត្ថកិច្ចជំនាញ កំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី-ច្បាប់៕