រាជធានីភ្នំពេញ ៖ កម្មពារទាន់ហ័ន្តពិតមែន មិនចាំយូរ! មានដៃមានជើងល្អៗ កម្លាំងមាំមួន មិនគិតខំប្រឹងធ្វើការងារសុច្ចរិត រកស៊ីធ្វើការត្រឹមត្រូវរកលុយទេ បែរជាធ្វើចោរឆក់ យករបស់មានតម្លៃ ដែលជាកម្លាំងញើសឈាមរបស់គេខំរកទាំងលំបាក ព្រះមិនប្រស់ ខណៈជនសង្ស័យម្នាក់ ជិះម៉ូតូឆក់កាបូបស្ពាយ ពីស្ត្រីម្នាក់ ជាគ្រូពេទ្យនៅមន្ទីរពេទ្យកុមារជាតិបានសម្រេច ជិះរត់ ត្រូវាបនជនរងគ្រោះជិះតាមពីក្រោយ និងស្រែកចោរៗ ភ័យពេកជិះម៉ូតូយ៉ាងលឿន មកបុកជាមួយម៉ូតូប្រជាពលរដ្ឋ ២គ្រឿងទៀត ពេញទំហឹង បោកក្បាលស្លាប់ផ្កាប់មុខក្នុងថ្លុកឈាមយ៉ាងរន្ធត់ ។ ខណៈប្រជាពលរដ្ឋជាម្ចាស់ម៉ូតូ២គ្រឿងទៀតនោះ រងរបួសត្រូវបានបញ្ជូនទៅកាន់មន្ទីរពេទ្យ ។

ហេតុការណ៍នេះបានកើតឡើងកាលពីវេលម៉ោង ៧និង ២០នាទី ព្រឹកថ្ងៃទី២៥ ខែកញ្ញា ឆ្នាំ២០២៣នេះ នៅចំណុចក្រោមស្ពានអាកាសចោមចៅ ផ្លូវជាតិលេខ៤ កែងនឹងផ្លូវសហព័ន្ធរុស្ស៊ី ក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ​។

តាមការបញ្ជាក់ពីជនរងគ្រោះផ្ទាល់ ក៏ដូចជាសមត្ថកិច្ច បានប្រាប់TVFB ឲ្យដឹងថា មុនពេលកើតហេតុ ជនសង្ស័យខាងលើ មានអាយុ២០ឆ្នាំជាង មិនទាន់ស្គាល់អត្តសញ្ញាណនោះទេកំពុងស្រាវជ្រាវ បានជិះម៉ូតូមួយគ្រឿងម៉ាក សង់សេ១២៥ ពណ៌ខ្មៅ ពាក់ស្លាកលេខ ភ្នំពេញ 1JA-5458 តែម្នាក់ឯង មកធ្វើសកម្មភាព ឆក់កាបូបស្ពាយ របស់ស្ត្រីរងគ្រោះម្នាក់ ជាអ្នកគ្រូពេទ្យ កំពុងជិះម៉ូតូម៉ាកហុងដាវ៉េវ តាមផ្លូវបំណងទៅធ្វើការនៅមន្ទីរពេទ្យកុមារជាតិ ដែលក្នុងកាបូបនោះ មានបាយ ទូរសព្ទ និងលុយតិចតួច បានសម្រេច នៅចំណុចក្រោមស្ពានអាកាសចោមចៅ ពេលនោះជនសង្ស័យក៏ជិះម៉ូតូរត់ ដោយមានជនរងគ្រោះជិះដេញតាមពីក្រោយ ស្រែកឆោឡោចោរៗផ្អើលពេញផ្លូវ ពេលនោះជនសង្ស័យក៏ជិះម៉ូតូរត់មកដល់ចំណុចមុខព្រលានយន្តហោះអន្តរជាតិភ្នំពេញ ក៏បត់ម៉ូតូយ៉ាងលឿនស្លេវ ទៅផ្លូវបេតុងព្រៃទារ ក៏បុកជាមួយម៉ូតូប្រជាពលរដ្ឋ ម៉ាកហុងដាប៊ីតពាក់ស្លាកលេខ ភ្នំពេញ 1KG-6670 ដែលកំពុងជិះចេញពីផ្លូវបេតុងព្រៃទារ ពីលិចមកកើត ឆ្លងផ្លូវសហព័ន្ធរុស្ស៊ី និងម៉ូតូមួយគ្រឿងទៀតម៉ាកសង់ ពាក់ស្លាកលេខ ភ្នំពេញ 1CW-4236 ដែលកំពុងជិះស្របលើផ្លូវសហព័ន្ធ រុស្ស៊ី បុកគ្នា៣គ្រឿងពេញទំហឹង ស្លាប់ជនសង្ស័យនោះ យ៉ាងរន្ធត់តែម្តង ។ ចំណែក ប្រជាពលរដ្ឋជាម្ចាស់ម៉ូតូ២គ្រឿងទៀតនោះ រងរបួសត្រូវបានបញ្ជូនទៅកាន់មន្ទីរពេទ្យ ។

ភ្លាមៗគេឃើញមានសមត្ថកិច្ចនគរបាលប៉ុស្តិ៍ចោមចៅ៣ និងនគរបាលជំនាញចរាចរណ៍ខណ្ឌពោធិ៍សែនជ័យ និងជំនាញចរាចរណ៍ក្រុង បានចុះមកដល់ទីតាំងកើតហេតុ ដោយបាននាំស្ត្រីរងគ្រោះ ដែលពាក់ព័ន្ធនឹងករណីឆក់ ទៅកាន់ប៉ុស្តិ៍ចោមចៅទី៣ ដើម្បីធ្វើការសាកសួរបំភ្លឺ និងដាក់ពាក្យបណ្តឹង ។ ចំណែកសពជនសង្ស័យសមត្ថកិច្ចកំពុងស្រាវជ្រាវរកអត្តសញ្ញាណ ខណៈម៉ូតូទាំង៣គ្រឿង ត្រូវបានសមត្ថកិច្ចជំនាញ យកទៅរក្សាទុក រង់ចាំដោះស្រាយគ្នាតាមច្បាប់បន្តទៀត ពិសេសសមត្ថកិច្ចជំនាញ កំពុងស្រាវជ្រាវជុំវិញករណីនេះ បន្ត ៕ អែល វិចិត្រ