ខេត្តកណ្តាល ៖ មានការភ្ញាក់ផ្អើលទាំងព្រឹក ខណៈប្រជាពលរដ្ឋបានប្រទះឃើញ សពបុរសម្នាក់ ស្លាប់ផ្គាប់មុខក្រោមដែកអន្ទារ ដោយជើងម្ខាង ថ្ពក់ជាប់នឹងអន្ទារនោះ មិនដឹងថាស្លាប់ដោយសារអ្វីនោះទេ បានប្រញាប់រាយការណ៍ជូនសមត្ថកិច្ច ចុះមកធ្វើការពិនិត្យនិងធ្វើកោស្យវិច័យ ។

ហេតុការណ៍នេះបានកើតឡើងនៅវេលាម៉ោង ៧ព្រឹក ថ្ងៃទី២៦ ខែកញ្ញា ឆ្នាំ២០២៣ នៅចំណុចក្នុងការដ្ឋានដីឡូត៍មួយកន្លែង ភូមិឆ្មាពួន ឃុំជើងកើប ស្រុកកណ្តាលស្ទឹង ខេត្តកណ្តាល។

ភ្លាមៗគេឃើញឪពុករបស់ជនរងគ្រោះបានត្រឡប់មកពីធ្វើការវិញ ដឹងដំណឹងកូន ក៏ប្រញាប់រត់មកមើល នៅទីតាំងកើតហេតុ និងបានបញ្ជាក់ថា កូនរបស់គាត់មានឈ្មោះ លី ចំរើន ភេទប្រុស អាយុ ២៣ឆ្នាំ ស្នាក់នៅភូមិប្រជុំអង្គ ឃុំជើងកើប ស្រុកណ្តាលស្ទឹង ខេត្តកណ្តាល។

សមត្ថកិច្ចបានឲ្យដឹងថា បើតាមការសាកសួរ អ្នកលក់ដូរនៅជិតនោះ បានឱ្យដឹងថា នៅមុនពេលកើតហេតុ មានជាងសំណង់​ដែលជាអ្នកធ្វើរបង បានមកប្រាប់គាត់ថា មានមនុស្សស្លាប់នៅក្នុងដីឡូត៍ នៅទល់មុខផ្ទះគាត់ ទើបគាត់រត់ទៅមើល ក៏ឃើញជនរងគ្រោះដេកផ្កាប់មុខស្លាប់បាត់ទៅហើយក្រោមដែកអន្ទារ ដោយជើងម្ខាង ថ្ពក់ជាប់នឹងអន្ទារនោះ មិនដឹងថាស្លាប់ដោយសារអ្វីនោះទេ បានប្រញាប់រាយការណ៍ជូនសមត្ថកិច្ច ចុះមកធ្វើការពិនិត្យនិងធ្វើកោស្យវិច័យ។

ក្នុងនោះតាមការពិនិត្យ សាកសព របស់សមត្ថកិច្ច ឃើញមានស្នាមខ្លោចខ្មៅពាសពេញចំហៀងកផ្នែកខាងស្តាំ និងស្នាមឆេះស្បែកប្រវែង ០៨x១cm, ដៃខាងឆ្វេងខ្ញាំបត់ម្រាមចូលក្នុង, នៅលើថ្ងាស់ផ្នែកខាងស្តាំមានស្នាមរលាត់ទំហំ៣x៣cm , មានស្នាមរលាត់ស្បែកត្រចុងចិញ្ចើមខាងឆ្វេងទំហំ១x១cm, ស្នាមរលាត់លើថ្ងាស់ខាងឆ្វេងប្រវែង ៥,៥x១cm, មានស្នាមរលាត់សើស្បែកនៅលើឆ្អឹងជំនីក្រោមដោះខាងស្តាំ ,ស្នាមខ្លោចឆេះខ្មៅនៅកំភួនជើងខាងឆ្វេងផ្នែកខាងក្នុងប្រវែង ១០x៤cm ,ស្នាមឆេះខ្លោចធ្លុះស្បែកលើស្មងជើងឆ្វេងផ្នែកខាងក្រៅរៀងបញ្ឆឹតប្រវែង ៩x៤.៥cm ,ស្នាមរលាត់កោសដាច់ស្បែកលើស្មងជើងខាងស្តាំប្រវែង ២x១cm។

ដូច្នេះតាមការសន្និដ្ឋាន របស់ជំនាញនិងលោកគ្រូពេទ្យសាកសពស្លាប់ដោយសារ ឆក់ចរន្តអគ្គិសនី និងបានត្រូវបានប្រគល់ជូន ក្រុមគ្រួសារធ្វើបុណ្យតាមប្រពៃណី៕ អែល វិចិត្រ