រាជធានីភ្នំពេញ ៖ បុរសម្នាក់ កំពុងតែអង្គុយប៉ះកង់នៅចិញ្ចឹមផ្លូវ ស្រាប់តែត្រូវបានរថយន្ត Highlander បើកមកបុកពេញទំហឹង បណ្ដាលឲ្យរបួសមួយគ្រួសារ និងស្លាប់ម្នាក់ ។

ហេតុការណ៍នេះកើតឡើងនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ វេលាម៉ោង៩យប់ ត្រូវថ្ងៃទី២៧ ខែកញ្ញា ឆ្នាំ ២០២៣។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសម្នាក់ បើករថយន្ដ Highlander ដែលពាក់ស្លាកលេខភ្នំពេញ 2AT 7065 បើកតាមបណ្ដោយផ្លូវ សហព័ន្ធរុស្ស៊ី ទិសដៅពីលិចទៅកើត ក្នុងល្បឿនលឿន ក៏បានរេចង្កូទៅបុកនឹងឃឿនផ្លូវ បន្ដទៅបុលរម៉កប៉ះកង់ដែលនៅចិញ្ចឹមផ្លូវ បណ្ដាលអោយមនុស្សមួយគ្រួសារ ស្លាប់ម្នាក់ជាកូនប្រុសរបស់អ្នកប៉ះកង់ឈ្មោះអុន ចាន់ធូ ភេទប្រុស អាយុ១៤ ឆ្នាំ មានស្រុកកំណើតនៅ ឃុំរកាកោង២ ស្រុកមុខកំពូល ខេត្តកណ្ដាល និងរងរបួស២នាក់ ត្រូវបានបញ្ជូនទៅមន្ទីរពេទ្យ។ ចំណែកអ្នកបើកបររថយន្ត ត្រូវបានប្រជាពលរដ្ឋចាប់ឃាត់ខ្លួនបាន ប្រគល់អោយសមត្ថកិច្ច។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក​នៃស្នងការរ​នគរបាល​រាជធានីភ្នំពេញ ​ធ្វើការវាស់វែងយករថយន្ដនិងរម៉ករក្សាទុក​ និងប្រគល់សពអោយទៅក្រុមគ្រួសារយកទៅធ្វើបុណ្យទៅតាមប្រពៃណី​​ ៕ Mrr Ka