រាជធានីភ្នំពេញ ៖ បុរសម្នាក់បើកកង់បីឥណ្ឌា ទៅបុករថយន្ត Toyota RAIZE រុញទៅបុកនឹងរថយន្ដមួយគ្រឿងទៀត ដែលចតនៅមុខហាងពេជ្រ ត្រង់ផ្លូវបំបែកជាបួន បណ្តាលឲ្យក្រឡាប់កង់បីផ្ងារជើង រងការខូចខាតយ៉ាងដំណំ ។

ហេតុការណ៍នេះកើតឡើងនៅតាមបណ្តោយផ្លូវ៥១ កែងផ្លូវ១៣៦ ក្នុងសង្កាត់ផ្សារថ្មីទី៣ ខណ្ឌដូនពេញ វេលាម៉ោង១០យប់ត្រូវនឹង ថ្ងៃទី៣០ ខែកញ្ញា ឆ្នាំ២០២៣ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញបុរសម្នាក់បើកកង់បីឥណ្ឌា បើកតាមបណ្ដោយផ្លូវ១៣៦ ក្នុងទិសដៅពីលិចមកកើត មកដល់ចំណុចកើតហេតុផ្លូវបំបែកជាបួន ក៏បានបុកត្រូវរថយន្ត Toyota RAIZE ដែលពាក់ស្លាកលេខ ភ្នំពេញ 2BW 3762 ពីចំហៀង រុញទៅបុកនឹងរថយន្ដមួយគ្រឿងទៀត ដែលចតនៅមុខហាងពេជ្រ ត្រង់ផ្លូវបំបែកជាបួន បណ្តាលឲ្យក្រឡាប់កង់បីផ្ងារជើង រងការខូចខាតយ៉ាងដំណំតែម្តង ។សំណាងល្អគ្មានអ្នករងរបួស ។

ក្រោយកើតហេតុ សមត្ថកិច្ចមូលដ្ឋានទំនាក់ទំនងទៅឲ្យសមត្ថកិច្ចជំនាញ ចុះមកធ្វើការវាស់វែង យករថយន្តទាំង២គ្រឿង ទៅរក្សាទុករង់ចាំធ្វើការដោះស្រាយគ្នានៅពេលក្រោយ៕ Mrr Ka