រាជធានីភ្នំពេញ ​៖ ករណីគ្រោះថ្នាក់ចរាចរណ៍មួយកើតឡើង ដោយបុរសម្នាក់ បានស្លាប់យ៉ាងរន្ធត់ ខណៈកំពុងជិះម៉ូតូតាមដងផ្លូវ ត្រូវបានសត្វគោមួយហ្វូង មិនដឹងថាជាគោរបស់អ្នកណានោះទេ ប្រលែងឲ្យដើរពេញលើផ្លូវ ឲ្យតែមានគ្រោះថ្នាក់ រកម្ចាស់មិនឃើញសោះ ដោយគោទាំងនោះ បានដើរចូលមកលើផ្លូវ ត្រូវម៉ូតូកំពុងជិះលឿន ចាប់ហ្វ្រាំងមិនទាន់ បុកពេញទំហឹង ដួលបោកក្បាលទៅលើផ្លូវ ស្លាប់យ៉ាងរន្ធត់ ។

ហេតុការណ៍នេះបានកើតឡើង នៅវេលាម៉ោង ១១និង ១៥នាទី យប់ថ្ងៃទី៣០ ខែកញ្ញា ឆ្នាំ២០២៣ ត្រង់ចំណុចខាងលិចបុរីឡាក់គី ផ្លូវបេតុង៥០ម៉ែត្រ ស្ថិតនៅក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង ខណៈម៉ូតូម៉ាក YAMAHA MX KING ពណ៌ខៀវ ពាក់ផ្លាកលេខ ភ្នំពេញ 1KG-6201 បើកបរដោយឈ្មោះ ផាន ផេង ភេទប្រុស អាយុ២៣ឆ្នាំ មុខរបរជាងដេគ័រ មានទីលំនៅភូមិព្រែកដូង ឃុំកំពង់ស្វាយ ស្រុកគៀនស្វាយ ខេត្តកណ្តាល បានជិះម៉ូតូក្នុងទិសដៅពីកើតទៅលិច តាមបណ្តោយផ្លូវខាងលើ លុះដល់ចំណុចកើតហេតុ ស្រាប់តែមានសត្វគោដើរឆ្លងផ្លូវពីត្បូងទៅជើង ស្របពេលម៉ូតូកំពុងជិះលឿនផង ព្រោះផ្លូវស្ងាត់ ចាប់ហ្វ្រាំងមិនទាន់ ក៏បុកសត្វគោនោះពេញទំហឹង បណ្តាលឲ្យដួលបោកក្បាលទៅផ្លូវទាំងពាក់មួកសុវត្ថិភាព ស្លាប់យ៉ាងរន្ធត់ តែម្តង ។

ពេលនេះសពត្រូវសមត្ថកិច្ចធ្វើកំណត់ហេតុប្រគល់ឲ្យសាច់ញាតិធ្វើបុណ្យតាមប្រពៃណី ខណៈម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌដង្កោ ។

ជុំវិញករណីខាងលើនេះ សូមបន្ថែមថា បើតាមការលើកឡើងដោយផ្ទាល់ពីប្រជាពលរដ្ឋ ដែលរស់នៅតាមបណ្តោយផ្លូវខាងលើ ពិសេសក្នុងភូមិសាស្ត្រសង្កាត់ជើង​ឯក និងប្របផ្លូវបេតុង៥០ម៉ែត្រនេះ បានលើកឡើងថា គាត់តែងតែឃើញ សត្វគោទាំងហ្វូងៗ ដើរពេញលើផ្លូវតែម្តង ហើយតែងតែបង្កគ្រោះថ្នាក់ជាញឹកញាប់ដល់អ្នកដំណើរ ខ្លះរបួស ខ្លះស្លាប់ដូចដែរឃើញស្រាប់ ហើយពេលមានបញ្ហាដល់អ្នកដ៏ទៃម្តងៗ រកម្ចាស់គោទាំងនេះមិនដែលឃើញសោះ មិនដឹងថាគាត់មានទំនួលខុសត្រូវយ៉ាងណា ចិញ្ចឹមសត្វប្រលែងឲ្យដើរទាំងហ្វូងលើផ្លូវ ផ្លូវសាធារណៈសម្រាប់យានយន្ត យានជំនិះធ្វើដំណើរ មិនមែនជាកន្លែងសម្រាប់ប្រលែងគោឲ្យស៊ីខ្មៅពាសវាល ពាសកាលនោះទេ ស្លាប់មនុស្ស របួសដល់គេសម្ងំចឺម តើអ្នកណាទទួលខុសត្រូវ និងបានសូមណូមពរដល់អាជ្ញាធរពាក់ព័ន្ធ រួមទាំងចៅសង្កាត់ និងអាជ្ញាធរខណ្ឌដង្កោ សូមជួយចាត់វិធានការទៅលើបញ្ហាទាំងនេះផង ដោយសូមស្រាវជ្រាវរកម្ចាស់គោទាំងនេះ ដើម្បីឲ្យទទួលខុសត្រូវលើជនរងគ្រោះផង ៕ អែលវិចិត្រ