រាជធានី​ភ្នំពេញ​៖ អគ្គិភ័យមួយបានឆាបឆេះ ផ្ទះមួយកន្លែងយ៉ាងសន្ធោសន្ធៅ ខ្ទេចអស់ទាំងស្រុង បង្កការភ្ញាក់ផ្អើលយ៉ាងខ្លាំង កាលពីវេលាម៉ោង ១១និង ៣០នាទី កណ្តាលអាធាត្រ ថ្ងៃទី៣ ខែតុលា ឆ្នាំ២០២៣ នៅចំណុច​ផ្ទះលេខ​ ២២៩ ផ្លូវ​ ៣១០ ក្រុម១៧ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ​ ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

ភ្លាមៗគ្រាន់តែទទួលបានព័ត៌មាននេះ លោកវសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជាដឹកនាំកម្លាំងចុះទៅអន្តរាគមន៍ភ្លាមៗ ដោយបានចេញរថយន្តទៅបាញ់ពន្លត់ ចំនួន ២គ្រឿង បាញ់ទឹកអស់ ២ឡាន និងមានរថយន្តជំនួយ ពីសាលាខណ្ឌច្បារអំពៅចំនួន​ ០១​ គ្រឿងប្រើប្រាស់ទឹកអស់​ ០១​ឡាន និង រថយន្តជំនួយកោះនរាចំនួន​ ០២​ គ្រឿង​ ប្រើប្រាសទឹកអស់​ ០១​ ឡាន ទើបរលត់ ទៅវិញនៅវេលាម៉ោង១រំលងអាធ្រាត្រ ឈានចូលថ្ងៃទី៤ ខែតុលា ឆ្នាំ២០២៣ ។

សមត្ថកិច្ចបានឲ្យដឹងថា ម្ចាស់ទីតាំង​ ប៊ុត ចន្ធី ភេទ​ ស្រី អាយុ ៥២​ ឆ្នាំ មុខរបរ​ មេផ្ទះ ខណៈមូលហេតុ នៃការឆាបឆេះនេះ សមត្ថកិច្ចកំពុងបន្ត​ការស្រាវជ្រាវ ដោយបានឆេះទីតាំង ប្រភេទ ថ្មក្រោមឈើលើ ទំហំ ៨ម៉ែត្រ X ១២ម៉ែត្រ អស់ទាំងស្រុង តែមិនបណ្តាលឲ្យរាលដាលដល់ផ្ទះអ្នកជិតខាងនោះទេ ៕