រាជធានីភ្នំពេញ​​៖ យោងតាមផេកស្នងការដ្ឋាននគរបាលរាជធានីភ្នំពេញ បានឲ្យដឹងថា សេចក្តីបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ទាក់ទងនឹងការបង្ហោះព័ត៌មានរបស់គណនីហ្វេសប៊ុកឈ្មោះ Oem Sreypenh ដែលមានខ្លឹមសារថា៖ ស្លាប់ចង កខ្លួនឯងយ៉ាងមិចបើគេវៃឡើងជាំដៃជាំជើងបែកផ្លោកនោម ហើយគ្នាមានកម្លាំងណាមកចងកទៀតជួយគិតមើល? ចងកណាចឹង។

ក្រោយពីបានឃើញព័ត៌មាននេះភ្លាមឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាឲ្យលោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ ដើម្បីធ្វើការស្រាវជ្រាវករណីនេះ

ក្រោយពីកម្លាំងជំនាញធ្វើការស្រាវជ្រាវរួចហើយ លោកអធិការនគរបាលខណ្ឌឫស្សីកែវ បានឲ្យដឹងថានៅថ្ងៃទី១​ ខែតុលា​ ឆ្នាំ២០២៣​ វេលាម៉ោង​ ២៣និង១០នាទី​ ជនរងគ្រោះ និងជនសង្ស័យ​ ជាដៃគូស្នេហានិគ្នា​ (ស្រលាញ់ភេទដូចគ្នា) ដោយជនរងគ្រោះដើរតួជាប្រពន្ធ​ និងជន​សង្ស័យដើរតួជាប្តី​។ នៅថ្ងៃទី០១ ខែតុលា ឆ្នាំ២០២៣ វេលាម៉ោង២៣និង១០នាទី ជនរងគ្រោះបានឈ្លោះប្រកែកគ្នាជាមួយជនសង្ស័យរឿងប្រច័ណ្ឌជនសង្ស័យ​មានទំនាក់ទំនងជាមួយឈ្មោះ​ វិត​ ភេទប្រុស​ ដែលជនទី៣ ក៏បង្កឲ្យមានអំពើហិង្សា (ប្រតាយប្រតប់​គ្នា​ហើយដួលទៅលើពួកទាំងពីរនាក់​ រួចជនសង្ស័យក៏បានក្រោកឈរជាន់មាត់​ និងចាប់ទាញអាវជនរងគ្រោះ​) ក្រោយមកជនរងគ្រោះបានទូរស័ព្ទប្រាប់ឈ្មោះ​ សំ​ ធា​ ដែលជាពូរបស់ជនរងគ្រោះ ដើម្បីមកសម្របសម្រួលគ្នា ដោយយកជនរងគ្រោះឡើងមកក្នុងបន្ទប់រួចចាក់សោរ ចំណែកជនសង្ស័យនៅខាងក្រៅបន្ទប់។ បន្ទាប់មកឈ្មោះ​ វិត​ បានមកដល់ផ្ទះ​ជនរងគ្រោះ រួចជនសង្ស័យ និងឈ្មោះ​ វិត​ ក៏មានឈ្លោះប្រកែកគ្នានៅក្រៅបន្ទប់ជាមួយជនរងគ្រោះម្តងទៀត បន្ទាប់មកឈ្មោះ​ វិត​ ក៏ត្រលប់ទៅវិញ​ ហើយជនសង្ស័យក៏ដេកនៅក្រៅបន្ទប់​។

លុះព្រឹកឡើងថ្ងៃទី០២​ ខែតុលា​ ឆ្នាំ២០២៣​ វេលាម៉ោង០៧និង០០នាទី​ ជនសង្ស័យបានក្រោកពីដេក​បានគោះទ្វារ​បន្ទប់​ និងទូរស័ព្ទទៅជនរងគ្រោះ​ ប៉ុន្តែគ្មានការឆ្លើយតប​ រហូតដល់វេលាម៉ោង​ ១១និង៣០នាទី​ នៅតែទាក់ទងជនរងគ្រោះ​មិនបាន​ ជនសង្ស័យក៏បានហៅជាងសោរមកឆ្កឹះសោរ​ ក៏ឃើញជនរងគ្រោះចងកស្លាប់នៅចំរឹងបង្អួច​។

ក្រោយពីទទួលបានព័ត៌មានសមត្ថកិច្ចបានចុះទៅដល់កន្លែងកើតហេតុ​ និងសហការជាមួយការិយាល័យបច្ចេកទេសវិទ្យាសាស្ត្រ​រាជធានីភ្នំពេញ​ ធ្វើកោសល្យវិច្ច័យសពជនរងគ្រោះ​ សន្និដ្ឋានថាជនរងគ្រោះស្លាប់ដោយសារចង កសម្លាប់ ខ្លួន។ បន្ទាប់មកម្តាយរបស់ជនរងគ្រោះបានដាក់ពាក្យបណ្តឹង​ ដើម្បីឲ្យសមត្ថកិច្ចចាត់តាមនិតិវីធីច្បាប់។

បច្ចុប្បន្នជនសង្ស័យជាប្តី សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់៕