រាជធានីភ្នំពេញ ៖ ពិតជារន្ធត់ណាស់លោកអើយ កូនៗស្រែកទ្រហ៊ោយំបោកខ្លួន ខណៈចូលដល់ក្នុងផ្ទះ ឃើញម្តាយ ស្លាប់ប្រឡាក់សុទ្ធតែឈាម ត្រូវឃាតក អារកសម្លាប់យ៉ាងរន្ធត់ ប្លន់យកទ្រព្យសម្បត្តិ ហើយប្រញាប់រត់គេចខ្លួនបាត់ ខណៈប្តីមកដល់ ទ្រហ៊ោយំឱបគ្នាជាមួយកូនៗនិងសាច់ញាតិ យ៉ាងសង្វេគបំផុត ។
ករណីឃាតកម្មនេះ បានកើតឡើងនៅវេលាម៉ោង ១២ និង ៥០នាទីថ្ងៃត្រង់ ទី៥ ខែតុលា ឆ្នាំ២០២៣ នៅចំណុចផ្ទះលក់ដូរមួយកន្លែង ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ឈឹម ស្រីមុំ អាយុ៤០ឆ្នាំ មុខរបរលក់ដូរ រស់នៅផ្ទះកើតហេតុខាងលើ ។
ភ្លាមៗគេឃើញវត្តមាន របស់លោកវរសេនីយ៍ឯក អេង សោភា នាយការិយាល័យ នគរបាលព្រហ្មខណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ កម្លាំងនគរបាលព្រហ្មទណ្ឌកម្រិតស្រាល និងកម្រិតធ្ងន់ នៃក្រសួងមហាផ្ទៃ នគរបាលព្រហ្មទណ្ឌខណ្ឌពោធិ៍សែនជ័យ នគរបាលប៉ុស្តិ៍ បានចុះមកធ្វើការហ៊ុំព័ទ្ធទីតាំងកើតហេតុ ដើម្បីធ្វើការពិនិត្យនិងធ្វើកោសល្យវិច័យ បញ្ជាក់ថា សពស្លាប់ដោយសារអំពើឃាតកម្មពិតមែន និងកំពុងស្រាវជ្រាវបន្ត សង្ស័យអាចជាករណីប្លន់ទ្រព្យសម្បត្តិ ព្រោះបើតាមការសាកសួរក្រុមគ្រួសារ ជនរងគ្រោះគ្មានគំនុំជាមួយអ្នកណានោះទេ ។
ក្នុងនោះបើតាមប្រភពពីប្រជាពលរដ្ឋនៅក្បែរទៅតាំងកើតហេតុ បានឲ្យដឹងថា មុនពេលកើតហេតុ គាត់បានឃើញបុរសម្នាក់ អង្គុយនៅលើគ្រែក្បែរផ្ទះកើតហេតុនោះ មួយសន្ទុះក្រោយមកក៏បាត់មិនឃើញ ពួកគាត់ក៏មិនបានចាប់អារម្មណ៍ តែអ្វីដែលតក់ស្លុត កូនចេញពីសាលារៀនវិញ មកដល់ឃើញឆ្កែងាប់នៅមុខផ្ទះ រួចក៏ចូលទៅក្នុងផ្ទះ ស្រាប់តែឃើញម្តាយស្លាប់ក្នុងថ្លុកឈាម ក៏រត់មកក្រៅស្រែកឆោឡោ ជួយម៉ែខ្ញុំផង ម៉ែខ្ញុំគេអារកស្លាប់ហើយ ទើបបង្កការភ្ញាក់ផ្អើលតែម្តង ខណៈប្តីវិញ គ្រាន់តែដឹងថាប្រពន្ធស្លាប់ ក៏ប្រញាប់ចេញពីធ្វើការនៅម្តុំរោងចក្រ.ឡ យំអោបគ្នាជាមួយកូន យ៉ាងសង្វេគបំផុត ៕ សម្រាប់ព័ត៌មានបន្ថែមយ៉ាងណាទៀតនោះ យើងនឹងផ្សាយជូនបន្តទៀត ៕ អែលវិចិត្រ + មេសា
