ខេត្ដកណ្ដាល៖ មានករណីអគ្គិភ័យមួយបានឆាបឆេះរថយន្តដឹកប្រេងមួយគ្រឿង ដោយមិនទាន់បានដឹងពីមូលហេតុឆាបឆេះយ៉ាងសន្ធោសន្ធៅ រងការខូចខាតស្ទើរតែទាំងស្រុង បប៉ុន្តែមិនបង្កឱ្យមានអ្នកណាម្នាក់រងរបួសទ្បើយ។

ហេតុការណ៍នេះបានកើតឡើងនៅថ្ងៃទី២៧ ខែមេសា ឆ្នាំ២០២១ កាលពីវេលាម៉ោង ៩និង២០នាទី នៅភូមិពាមរាំងលើ ឃុំពាមរាំង ស្រុកលើកដែក ខេត្តកណ្ដាល។

នគរបាលស្រុកលើកដែកបានឱ្យដឹងថា រថយន្តសាទែនដឹកប្រេងសាំង និងម៉ាស៊ូតនេះជារបស់ឈ្មោះ គឹម គិន ភេទប្រុស អាយុ៥៧ឆ្នាំ ជនជាតិខ្មែរ មានទីលំនៅភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្ដាល។ ចំណែកតៃកុងរថយន្ត ឈ្មោះ គិន វណ្ណដេត ភេទប្រុស អាយុ៣១ឆ្នាំ ជនជាតិខ្មែរ។ ចំពោះសម្ភារដែលខូចខាតនោះរួមមាន រថយន្តដឹកប្រេងសាំង និងម៉ាស៊ូតចំនួន១គ្រឿង ផ្ទុកប្រេងសាំងចំនួន ២០០០លីត្រ ប្រេងម៉ាស៊ូតចំនួន៤០០០លីត្រ(ឆាបឆេះអស់ទាំងស្រុង)។

នគរបាលបន្តថា រថយន្តខាងលើបានដឹកប្រេងសាំង និងម៉ាស៊ូត ទៅបោះឱ្យម៉ូយនៅតាមភូមិ លុះមកដល់ចំណុចភូមិពាមរាំងលើ ឃុំពាមរាំង ស្រុកលើកដែក ខេត្តកណ្ដាល ដោយមិនដឹងមូលហេតុ ស្រាប់តែមានភ្លើងឆាបឆេះ ហើយតៃកុងរថយន្ត បានយកបំពង់ពន្លត់អគ្គិភ័យចំនួន២ធុងទៅបាញ់ពន្លត់ហើយនៅតែមិនរលត់ រួចបានបើកគេចចូលទៅក្នុងព្រៃចម្ការស្វាយខាងកើតក្រោយភូមិ និងបានឆាបឆេះយ៉ាងសន្ធោសន្ធៅអស់ទាំងស្រុង៕

(មានវីដេអូ)https://youtu.be/SGCix2_5AlM