រាជធានីភ្នំពេញ៖ រថយន្តម៉ាកហាយឡែនឌ័រមួយគ្រឿង បានរងការខូចខាតស្រុញក្បាលខាងមុខធ្ងន់ធ្ងរ ខណៈរបាំងថ្មចែកទ្រូងក៏រងការខូចខាត ក្រោយត្រូវបានរថយន្តនេះបុកពេញទំហឹង កាលពីវេលាម៉ោង ៧និង៣៥នាទីយប់ ថ្ងៃទី២ ខែឧសភា ឆ្នាំ២០២១ មុខវិទ្យាល័យបឹងត្របែក ផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ប្រភពព័ត៌មានបានឲ្យដឹងថា រថយន្តដែលជួបគ្រោះថ្នាក់នេះ ម៉ាកហាយឡែនឌ័រ ពណ៌ទឹកប្រាក់ បើកបដោយស្រ្តីម្នាក់ និងមានអ្នករួមដំណើរជាមួយ៣នាក់ទៀត បើកបរពីត្បូងមកជើង បានរេចង្កូតបុករបាំងថ្មចែកទ្រូងផ្លូវ ពេញទំហឹង បណ្តាលឲ្យរថយន្តរងការខូចខាតស្រុញក្បាលខាងមុខធ្ងន់ធ្ងរ ខណៈរបាំងថ្មចែកទ្រូងក៏រងការខូចខាតដូចគ្នា តែមនុស្សនៅក្នុងរថយន្តគ្មាននរណាម្នាក់របួសនោះទេ ។
ក្រោយពេលកើតហេតុ សមត្ថកិច្ចជំនាញ បានធ្វើការវាស់វែង យករថយន្តទៅរក្សាទុកនៅខាងការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនៅពេលក្រោយតាមច្បាប់៕
