រាជធានីភ្នំពេញ៖ សមត្ថកិច្ច បានធ្វើការនាំខ្លួន ជនសង្ស័យ២នាក់ យកទៅសួរនាំភ្លាមៗ បន្ទាប់ពីមានការសង្ស័យថាបានធ្វើសកម្មភាពគាស់រោងអេតចាយរបស់ប្រជាពលរដ្ឋដើម្បីលួច កាលពីវេលាម៉ោង១០យប់ ថ្ងៃទី៤ ខែឧសភា ឆ្នាំ២០២១ ក្នុងសង្កាត់ទឹកល្អក់ ១ ខណ្ឌទួលគោក រាជធានីភ្នំពេញ។

ប្រភពព័ត៌មានពីបុរសម្នាក់ដែលជាបុគ្គលិកប្រចាំហាងជាប់កន្លែងកើតហេតុបានប្រាប់ឲ្យបានដឹងថា មុនពេលកើតហេតុ គាត់បានលឺសម្លេងនៅខាងក្រៅ ក៏បើកទ្វារមកមើលឃើញ បុរស២នាក់កំពុងតែគាស់យកសំបកអេតចាយ ទើបស្រែកឆោឡោហៅសមត្ថកិច្ចមកឃាត់ខ្លួនតែម្ដង។

ក្រោយកើតហេតុ សមត្ថកិច្ចបាននាំខ្លួនជនសង្ស័យទាំង២នាក់ខាងលើ យកទៅសាកសួរនាំនៅប៉ុស្តិ៍នគរបាលរដ្ឋបាលទឹកល្អក់១ ដើម្បីចាត់ការតាមនីតិវិធីផ្លូវច្បាប់ និងដកហូតបានអេតចាយ ចំនួន៣បាវផងដែរ៕