ខេត្តកោះកុង៖ ជនសង្ស័យចំនួន ៥នាក់ ត្រូវបាន កម្លាំងការិយាល័យជំនាញកងរាជអាវុធហត្ថខេត្តកោះកុង ចាប់ឃាត់ខ្លួន ដកហូតបានថ្នាំញៀនចំនួន៤៦កញ្ចប់ រួមទាំងវត្ថុតាងមួយចំនួនទៀត កាលពីវេលាម៉ោង ៣ និង១០នាទី រសៀល ថ្ងៃទី៥ ខែឧសភា ឆ្នាំ២០២១ នៅចំណុចផែ ប្រមូលផលនេសាទ ក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។

ការបង្ក្រាបនេះ មានការដឹកនាំដោយ លោក វរសេនីយ៍ទោ នួន វុត្ថា មេបញ្ជាការរង កងរាជអាវុធហត្ថខេត្ត និងដោយមានការចង្អុលបង្ហាញពី លោក ឧត្តមសេនីយ៍ត្រី ថុង ណារុង មេបញ្ជាការ កងរាជអាវុធហត្ថខេត្ត សម្របសម្រួលនីតិវិធីពីព្រះរាជអាជ្ញាអមសាលាដំបូងខេត្តកោះកុង ផងដែរ ។

ជាលទ្ធផល កងកម្លាំងឃាត់ខ្លួនបានជនសង្ស័យសរុបចំនួន ៥នាក់ ដកហូតវត្ថុតាងពាក់ព័ន្ធមួយចំនួនធំ កំពុងត្រូវបានបញ្ជូនទៅអយ្យការអមសាលាដំបូងខេត្ត ដើម្បីចាត់ការតាមច្បាប់ ៕ ប្រភព៖ GRK News