រាជធានីភ្នំពេញ ៖ ផ្អើលកម្លាំងអន្តរាគមន៍ពិសេស ខណ្ឌជ្រោយចង្វារ ជាច្រើននាក់ ចុះធ្វើការឃាត់ខ្លួន កម្មករសំណង់ចំនួន ២ក្រុម ខណៈផឹកស៊ីស្រវឹង ទាញដាវកាប់គ្នា បណ្តាលឲ្យមានអ្នករបួសធ្ងន់ ផ្តើមចេញពីរឿងបាត់លុយ ៥០ដុល្លារ កាលពីវេលាម៉ោង ៩ និង៣០នាទីយប់ ថ្ងៃទី៧ ខែឧសភា ឆ្នាំ២០២១ នៅចំណុចការដ្ឋានសំណង់ជាប់នឹងផ្លូវOCIC ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
តាមប្រភពព័ត៌មាន ពីកន្លែងកើតហេតុ បាននិយាយថា មុនពេលកើតហេតុ មានភាគីឪពុកនិងកូន ដែលរបួសនោះគឺ បាននាំគ្នាផឹកស៊ីតាំងពីព្រលប់មកម្ល៉េះ លុះដល់ម៉ោងកើតហេតុ ស្រាប់តែមានម្តាយភាគីអ្នកដែលកាប់ បានស្រែកថា បាត់លុយចំនួន៥០ដុល្លារ ហើយភាគីដែលអង្គុយផឹក ក៏ស្រែកបោះពាក្យសម្តីដៀមដាម រហូតផ្ទុះហិង្សាររវាងគ្នានឹងគ្នាឈានដល់ភាគីម្ខាង ទាញដាវ កាប់ជនរងគ្រោះ និងប្រពន្ធត្រូវដៃដូចគ្នារងរបួស ប៉ុន្តែភាគីខាងអ្នកកាប់នោះ បាននិយាយថា ពួកគេគ្មានដាវទេ មានតែដំបងដែក ឈ្លោះគ្នាទៅវិញទៅមក រហូតផ្អើលដល់ កម្លាំងអន្តរាគមន៍ពិសេស ខណ្ឌជ្រោយចង្វារ ជាច្រើននាក់ ចុះធ្វើការឃាត់ខ្លួន កម្មករសំណង់ចំនួន ២ក្រុម បញ្ជូនទៅកាន់អធិការដ្ឋាននគរបាលខណ្ឌជ្រោយចង្វារ ដោយភាគីខាងរបួសបានដាក់ពាក្យបណ្តឹង ដើម្បីឲ្យសមត្ថកិច្ចកសាងសំណុំរឿង ចាត់ការតាមច្បាប់៕
