ខេត្តកណ្ដាល៖ អគ្គិភ័យមួយបានឆាបឆេះផ្សារតាខ្មៅ យ៉ាងសន្ធោសន្ធៅ បង្កការភ្ញាក់ផ្អើលខ្លាំងដល់បងប្អូនប្រជាពលរដ្ឋ ដែលជាអាជីវក នាំគ្នាជញ្ជូនអីវ៉ាន់រត់ ខ្លះយកចេញបាន ខ្លះទៀតជញ្ជូនចេញមិនទាន់ ត្រូវភ្លើងឆាបឆេះអស់គ្មានសល់តែម្តង កាលពីវេលាម៉ោង ៩ និង៣០នាទីព្រឹក ថ្ងៃទី១០ ខែឧសភា ឆ្នាំ២០២១ នៅចំណុចផ្សារតាខ្មៅ ស្ថិតក្នង ភូមិ-សង្កាត់តាខ្មៅ ក្រុងតាខ្មៅ ខេត្តកណ្តាល។
នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានបញ្ជាក់ថា អគ្គិភ័យដែលឆាបឆេះផ្សារនេះ គឺបណ្ដាល មកពីការផ្សារដែករបស់ជាងផ្សារដំបូលធ្លាក់មកត្រូវប៉ាតង់កៅស៊ូ និងសំបកកង់ម៉ូតូដែលនៅខាងក្រោម ទើបឆេះរាលដាលយ៉ាងសន្ធោសន្ធៅតែម្តង ដោយបានបំផ្លាញ តូបលក់គ្រឿង បន្លាស់ម៉ូតូចំនួន ១២ តូប តែមិនបណ្តាលឲ្យគ្រោះថ្នាក់ដល់មនុស្សឡើយ ។
ភ្លាមៗគេឃើញកងកម្លាំងសមត្ថកិច្ចពាក់ព័ន្ធជាច្រើននាក់ បានចុះអន្តរាគមន៍ ដោយបានប្រើប្រាស់រថយន្តពន្លត់អគ្គិភ័យចំនួន ០៨ គ្រឿង រួម មាន ៖
- រថយន្តស្នងការ ខេត្ត ចំនួន ០៣ គ្រឿង
- រថយន្តរបស់នាយកដ្ឋាន បង្ការ ពន្លត់ អគ្គិភ័យ ០៣ គ្រឿង
- រថយន្តបញ្ជាការដ្ឋានអង្គរក្ស ០២ គ្រឿង ប្រើប្រាស់ទឹក ចំនួន ១៦ រថយន្ត ទើបរលត់ទៅវិញជាស្ថាពរ នៅវេលាម៉ោង១០និង៣០ នាទីរសៀល ថ្ងៃដដែល ៕
