ខេត្តបន្ទាយមានជ័យ៖ រន្ទះបាញ់២ករណី បណ្តាលស្លាប់មនុស្សម្នាក់ របួសធ្ងន់៤នាក់ ងាប់គោ១ក្បាលនៅពេលតែមួយ វេលាម៉ោង២និង១៥នាទី ថ្ងៃទី១៤ ខែឧសភា ឆ្នាំ២០២១ ក្នុងឃុំណាំតៅ ស្រុកភ្នំស្រុក។
លោក យឹម សំណាង អភិបាលស្រុកភ្នំស្រុក បានប្រាប់ថា៖ នៅពេលដែលមានភ្លៀងធ្លាក់ បណ្តាលរងគ្រោះដោយធម្មជាតិរន្ទះបាញ់មាន២ករណី បណ្តាលស្លាប់ស្ត្រីម្នាក់ និងរបួស៤នាក់ និងងាប់គោ១ក្បាលនៅពេលតែមួយ។
ករណី១. នៅពេលជនរងគ្រោះទៅព្រួសស្រូវ នៅវាលស្រែខាងលិចភូមិ ប្រមាណ៥គីឡូម៉ែត្រ ហើយមានភ្លៀងធ្លាក់លាយឡំដោយផ្គរលាន់ ហើយនាំគ្នារត់ពីស្រែមកជ្រកក្រោមទ្រុងគោយន្តកន្ត្រៃ ហើយត្រូវរន្ទះបាញ់ស្លាប់ស្ត្រីម្នាក់ឈ្មោះ បឿន សាលន អាយុ២៥ឆ្នាំ និងរបួសធ្ងន់៤នាក់ មាន១.ឈ្មោះ ម៉ាន មាស់ ភេទប្រុសអាយុ៣១ឆ្នាំ ២.លឿន រតនៈ ភេទប្រុសអាយុ៣១ឆ្នាំ ៣.ឈ្មោះ ឌួន វណ្ណា ភេទប្រុស អាយុ១៣ឆ្នាំ ៤.ឈ្មោះ បូស សៀវឡី ភេទស្រីអាយុ៣ឆ្នាំ រស់នៅភូមិក្នាំង ឃុំណាំតៅ ស្រុកភ្នំស្រុក។
ករណីទី២.រន្ទះបាញ់គោ១ក្បាល ងាប់នៅពេលលែងអោយស៊ីស្មៅខាងលិចវាលស្រែនៅស្ថិតភូមិតាគង់ ឃុំណាំតៅ ស្រុកភ្នំស្រុក ម្ចាស់ឈ្មោះ ជិម សាឃឿន ភេទប្រុសអាយុ៤៧ឆ្នាំ រស់នៅភូមិខាងលើ។
លោល យឹម សំណាង បានបញ្ជាក់ថា៖ ជនរងគ្រោះដោយធម្មជាតិរន្ទះបាញ់ស្លាប់ស្រីម្នាក់ និងរបួស៤នាក់ ស្រីម្នាក់កំពុងសម្រាកព្យបាលនៅមន្ទីពេទ្យបង្អែកស្រុកភ្នំស្រុក ហើយសុំអំពាវនាវដល់បងប្អូនប្រជាពលរដ្ឋត្រូវមានការប្រុងប្រយ័ត្នអោយបានខ្ពស់នៅពេលមានភ្លៀងធ្លាក់ផ្គរលាន់ការពារគ្រោះធម្មជាតិរន្ទះបាញ់កើតឡើងស្លាប់និងរបួស៕ ដោយ៖ចិន្ត្រា
