វ៉ាស៊ីនតោន៖ ក្រសួងការបរទេសអាមេរិកបាននិយាយថា សហរដ្ឋអាមេរិកនិងតាលីបង់ នឹងធ្វើកិច្ចចរចាផ្ទាល់ ជាលើកដំបូង ចាប់តាំងពីការដកទ័ពអាមេរិកចេញពីអាហ្វហ្គានីស្ថាន ដែលចាប់ផ្តើមនៅថ្ងៃសៅរ៍ទី ៩ ខែតុលានេះ។

បើតាមការចេញផ្សាយសារព័ត៌មាន Channel News Asia នៅថ្ងៃទី០៩ ខែតុលា ឆ្នាំ២០២១នេះថា អ្នកនាំពាក្យក្រសួងការបរទេសអាមេរិក បាននិយាយថា គណៈប្រតិភូអាមេរិក នឹងជួបថ្ងៃសៅរ៍និងថ្ងៃអាទិត្យនៅរដ្ឋធានីដូហា ប្រទេសកាតា ជាមួយតំណាងតាលីបង់ជាន់ខ្ពស់។

សហរដ្ឋអាមេរិកនៅតែមានទំនាក់ទំនងជាមួយតាលីបង់ ចាប់តាំងពីក្លាយជាសត្រូវអស់រយៈពេលជាយូរមក ហើយ បានដណ្តើមកាន់កាប់ទីក្រុងកាប៊ុលកាលពីខែសីហា នៅពេលដែលកងទ័ពអាមេរិកដកខ្លួនចេញ ប៉ុន្តែកិច្ចប្រជុំនេះនឹងក្លាយជាជំនួបលើកដំបូង។

អ្នកនាំពាក្យរូបនេះបាននិយាយកាលពីថ្ងៃសុក្រថា« យើងនឹងសង្កត់តាលីបង់ឱ្យគោរពសិទ្ធិរបស់ជនជាតិអាហ្វហ្គានីស្ថានទាំងអស់ រួមទាំងស្ត្រីនិងក្មេងស្រី និងបង្កើតរដ្ឋាភិបាលរួមបញ្ចូលគ្នា ដោយមានការគាំទ្រយ៉ាងទូលំទូលាយ»។

លោកបានមានប្រសាសន៍ថា«នៅពេលអាហ្វហ្គានីស្ថាន ប្រឈមមុខនឹងការធ្លាក់ចុះនៃសេដ្ឋកិច្ចធ្ងន់ធ្ងរនិងវិបត្តិសេដ្ឋកិច្ច ដែលអាចកើតមាន យើងក៏នឹងសង្កត់តាលីបង់ ដើម្បីអនុញ្ញាតឱ្យទីភ្នាក់ងារមនុស្សធម៌ អាចចូលទៅកាន់តំបន់ដែលត្រូវការដោយសេរី»។

ក្រសួងការបរទេសបានសង្កត់ធ្ងន់ថ កិច្ចប្រជុំនេះមិនបានបង្ហាញថា សហរដ្ឋអាមេរិក កំពុងទទួលស្គាល់ការគ្រប់គ្រងរបស់តាលីបង់នៅអាហ្វហ្គានីស្ថាននោះឡើយ៕

ប្រភព៖  Channel News Asia