រាជធានៅភ្នំពេញ ៖ រថយន្ដព្រូសមួយគ្រឿង បុកគ្នាជាមួយរថយន្ដធុនធំមួយគ្រឿងទៀត រួចបន្ដបុករះបង្គោលភ្លើងស្តុបចរាចរណ៍ និងកង់បីឥណ្ឌា បណ្ដាលឲ្យរងការខូចខាតជាច្រើនគ្រឿង និងមានមនុស្សម្នាក់រងរបួសធ្ងន់ម្នាក់ ត្រង់ផ្លូវបំបែកជាបួន កាលពីវេលាម៉ោង១យប់ឈានចូល ថ្ងៃទី៧ ខែមករា ឆ្នាំ២០២២ នៅតាមបណ្ដោយផ្លូវ២៨៩ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

ប្រភពព័ត៌មានពីបងប្អូនប្រជាពលរដ្ឋ បានដឹងថា មុនពេលកើតហេតុ គេបានឃើញរថយន្តព្រូសមួយគ្រឿង ដែលពាក់ស្លាកលេខ ភ្នំពេញ 2BE-5961 ធ្វើដំណើរតាមបណ្ដោយផ្លូវ៥២៨ ក្នុងទិសដៅពីកើតមកលិច មកដល់ចំណុចកើតហេតុ ស្តុបបំបែកជាបួន ក៏បានបុកគ្នាជាមួយនឹងរថយន្តធុនធំមួយគ្រឿង ដែលពាក់ស្លាកលេខ កំពង់ចាម 3A-8646 ធ្វើដំណើរតាមបណ្ដោយផ្លូវ២៨៩ ក្នុងទិសដៅពីជើងទៅត្បូង ក៏បានបុកគ្នាត្រង់ផ្លូវបំបែកជាបួន បណ្ដាលឲ្យរថយន្តធុនធំខាងលើ រេចង្កូតទៅបុករះ ត្រូវបង្គោលស្តុបចរាចរណ៍ និងបុកត្រូវកង់បីមួយគ្រឿងទៀត បណ្ដាលឲ្យមានមនុស្សម្នាក់រងរបួសធ្ងន់ ត្រូវបានបញ្ជូនទៅមន្ទីរពេទ្យភ្លាមភ្លាមៗ ។

ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ទីតាំងកើតហេតុ ដោយបានសហការជាមួយនគរបាលចរាចរណ៍ជំនាញក្រុង ធ្វើការវាស់វែង យកវត្ថុតាងពាក់ព័ន្ធខាងលើ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕ Mrr Ka