ខេត្តបាត់ដំបង៖ យោងតាមផេកស្នងការដ្ឋាននគរបាលខេត្តបាត់ដំបង បានឲ្យដឹងថា សមត្ថកិច្ចនគរបាលក្រុងបាត់ដំបង សហការជាមួយនគរបាលព្រហ្មទណ្ឌនៃស្នងការដ្ឋាននគរបាលខេត្ត បានធ្វើការស្រាវជ្រាវចាប់ឃាត់ខ្លួនបានជនសង្ស័យជាឃាតក ដែលបានសម្លាប់ប្រពន្ធទុកសាកសពចោលក្នុងបន្ទប់ជួលរហូតមានក្លិនស្អុយ ទើបដឹងដល់អ្នកជិតខាងបានហើយ កាលពីថ្ងៃទី៦ ខែមេសា ឆ្នាំ២០២១ ។
ការបង្ក្រាបនេះគឺ អនុវត្តតាមបទបញ្ជារបស់លោកឧត្តមសេនីយ៍ទោ សាត គឹម សាន ស្នងការនៃស្នងការដ្ឋាននគរបាលខេត្តបាត់ដំបង ដោយមានការសម្របសម្រួលពីឯកឧត្តម គឺ ប៊ុណ្ណារ៉ា ព្រះរាជអាជ្ញាអមសាលាដំបូងខេត្តបាត់ដំបង ។
សមត្ថកិច្ចបានឲ្យដឹងថា ជនសង្ស័យជាឃាតកនេះមានឈ្មោះ ប៉ុល ប៊ុនធឿន ភេទប្រុស អាយុ៤០ឆ្នាំ មានទីលំនៅផ្ទះជួល ភូមិរំចេក៣ សង្កាត់រតនៈ ក្រុងបាត់ដំបង ខេត្តបាត់ដំបង ត្រូវបានចាប់ឃាត់ខ្លួន បញ្ជូនមកកាន់អធិការដ្ឋាននគរបាលក្រុងបាត់ដំបង ដើម្បីធ្វើការសាកសួរ ស្រាវជ្រាវជុំវិញករណី(ឃាតកម្ម) សម្លាប់ប្រពន្ធរបស់ខ្លួន។
សូមបញ្ជាក់ថា កាលពីរសៀលថ្ងៃទី៦ ខែមេសា ឆ្នាំ២០២១ នៅចំណុចផ្ទះជួល ក្នុងក្រុមទី ០១ ភូមិរំចេក៣ សង្កាត់រតនៈ ក្រុងបាត់ដំបង ខេត្តបាត់ដំបង មានការភ្ញាក់ផ្អើលមួយបានកើតឡើង បន្ទាប់ពីប្រទះឃើញស្រី្តឈ្មោះ សេង វ៉េត ហៅស អាយុ៣៩ឆ្នាំ បានដេកស្លាប់ក្នុងបន្ទប់ជួលក្នុងសភាព ខ្លាំងនិងធំក្លិនស្អុយ ភាយមកខាងក្រៅ ដោយមិនដឹងពីមូលហេតុ។ សមត្ថកិច្ចបានបើកការស្រាវជ្រាវ ឈានដល់ការនាំខ្លួនបុរសជាប្តី របស់ជនរងគ្រោះមកធ្វើការសាកសួរ។
នៅចំពោះមុខសមត្ថកិច្ចបុរសជាប្តីឈ្មោះ ប៉ុល ប៊ុនធឿន បានឆ្លើយសារភាពថា គាត់ពិតជាបានសម្លាប់ប្រពន្ធគាត់កាលពីថ្ងៃទី៤ ខែមេសា ឆ្នាំ២០២១ នាវេលាយប់រំលងអាធ្រាត្រ ដោយការវាយដំលើផ្ទៃមុខនិងច្របាច់ករហូតដល់ស្លាប់។
ចំពោះមូលហេតុដែលឈានដល់ការសម្លាប់ប្រពន្ធបែបនេះ គឺដោយសារប្រពន្ធគាត់តែងតែជេរប្រមាថគាត់នៅពេលខឹង ហើយតែងតែទូរស័ព្ទទៅរកប្តីមុន(អតីត) របស់គាត់និងនិយាយសរសើរប្តីមុននៅចំពោះមុខគាត់ជាញឹកញយ។
តាមការរៀបរាប់ជនស័្សយរូបនេះបានឲ្យដឹងថា រូបគាត់និងស្រី្តរងគ្រោះទើបនឹងបានគ្នាជាប្តី ប្រពន្ធក្នុងរយ:ពេលតែជាងមួយឆ្នាំប៉ុណ្ណោះ ហើយស្រ្តីជា ប្រពន្ធនេះមានទីលំនៅឯខេត្កកណ្តាល ហើយគាត់បានគ្នាក្នុងពេលធ្វើកម្មកររោងចក្រនៅខេត្តតាកែវជាមួយគ្នា និងទើបមកជួលបន្ទប់ ស្នាក់នៅទីនេះក្នុងអំ ឡុងខែ មីនា ឆ្នាំ២០២១តែប៉ុណ្ណោះ ។
បច្ចុប្បន្នសមត្ថកិច្ចនគរបាលកំពុងរៀបចំសំណុំ រឿងបញ្ជូនមកការិយាល័យជំនាញដើម្បីបញ្ជូនបន្តទៅកាន់តុលារការអនុវត្តតាមផ្លូវច្បាប់ ៕
