ខេត្តស្វាយរៀង៖ ម៉ូតូចំនួន២គ្រឿង បានបុកគ្នាពេញទំហឹង បណ្តាលឲ្យមនុស្សយ៉ាងហោចណាស់ ៤នាក់ បានរងរបួសធ្ងន់ស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ កាលពីវេលាម៉ោងជិត៧ព្រឹក ថ្ងៃទី១០ ខែមេសា ឆ្នាំ២០២១ លើផ្លូវ ៣១៦A ក្នុងស្រុកចន្រ្ទា ខេត្តស្វាយរៀង។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរស២នាក់ បានជិះម៉ូតូមួយគ្រឿង ម៉ាក Winner X ស៊េរី២០២០ ពណ៌ខៀវ អត់ស្លាកលេខ បានបុកជាមួយនឹងម៉ូតូម៉ាកហុងដាសេ ១២៥ ពណ៌ខ្មៅ ដែលកំពុងជិះគ្នា២នាក់ប្ដីប្រពន្ធ ស្របទិសគ្នាយ៉ាងពេញទំហឹង បណ្តាលឲ្យរបួសធ្ងន់ស្រាល៤នាក់ត្រូវបាន ក្រុមគ្រួសារ យកទៅព្យាបាលនៅមណ្ឌលសុខភាព។

ចំណែកម៉ូតូទាំង២គ្រឿង ត្រូវបានសមត្ថកិច្ចវាស់វែង យកទៅរក្សាទុកនៅអធិការដ្ឋាននគរបាលស្រុកចន្រ្ទា រង់ចាំដោះស្រាយគ្នាតាមច្បាប់បន្តទៀត៕