រាជធានីភ្នំពេញ ៖ រថយន្តព្រូសមួយគ្រឿង បានបុករបាំងថ្មចែកទ្រូងផ្លូវ ហោះទុំក្បាលរថយន្ត គងលើរបាំងថ្ម ដូចគេចាប់ដាក់ បង្កការភ្ញាក់ផ្អើលដល់អ្នកដំណើរ កាលពីវេលាម៉ោង ៦ និង២០នាទី ព្រឹកថ្ងៃទី១៤ ខែសីហា ឆ្នាំ២០២៣នេះ នៅចំណុចភ្លើងស្តុបគិរីវង់ តាមបណ្តោយមហាវិថីព្រះសីហនុ សង្កាត់វាលវង់ ខណ្ឌ៧មករា រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញ រថយន្តព្រូស ខាងលើ ពាក់ស្លាកលេខ កំពង់ស្ពឺ 2C-0059 បើកបរដោយនារីម្នាក់ រួមដំណើរជាមួយនារីម្នាក់ទៀត ក្នុងទិសដៅពីលិចមកកើត ដោយល្បឿនលឿន លុះដល់ចំណុចកើតហេតុ មិនដឹងយ៉ាងម៉េច ក៏បុក ក្បាលព្រួញចែកទ្រូងផ្លូវពេញទំហឹង ហោះទុំក្បាលរថយន្ត គងលើរបាំងថ្ម ដូចគេចាប់ដាក់ បង្កការភ្ញាក់ផ្អើលដល់អ្នកដំណើរ តែម្តង រួចប្រញាប់ ចុះពីលើរថយន្ត គេចខ្លួនបាត់ សល់តែរថយន្តតែប៉ុណ្ណោះ ។

ក្រោយកើតហេតុ សមត្ថកិច្ចចរាចរណ៍ខណ្ឌ ៧មករា បានចុះមកធ្វើការវាស់វែង ស្ទូចយករថយន្តទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕ អែល វិចិត្រ