ខេត្តបាត់ដំបង ៖ យោងតាមផេក ស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីយប់ថ្ងៃទី១២ខែ សីហាឆ្នាំ២០២៣ ចន្លោះម៉ោង១២ទៅម៉ោង១រំលងអធ្រាត្រចូលថ្ងៃទី១៣ ខែ សីហាឆ្នាំ២០២៣ នៅចំណុចក្រុមទី២ ភូមិកោះថ្កូវ ឃុំគារ ស្រុកមោងឫស្សី ខេត្តបាត់ដំបង មានករណីលួចយកម៉ូតូមួយបានកើតឡើង បង្កដោយជនសង្ស័យមិនស្គាល់អត្តសញ្ញាណ បានចូលលួចម៉ូតូ១គ្រឿង ម៉ាកហុងដាសូនិច ពណ៌ស លាយ ក្រហម គ្មានស្លាកលេខ សេរីឆ្នាំ ២០២១ (គ្មានពន្ធ) ជារបស់ឈ្មោះ ឆម រី ភេទប្រុស អាយុ២៨ឆ្នាំ រស់នៅចំណុចកើតហេតុខាងលើដែលបញ្ឈរ ទុកនៅក្រោមផ្ទះ(ទុកទាំងសោរ)នៅជាប់ម៉ូតូ រីឯម្ចាស់ចូលសម្រាក ក្នុងបន្ទប់ក្រោមផ្ទះ លុះភ្លឺឡើងភ្ញាក់ពីដំណេកមើលម៉ូតូស្រាប់តែបាត់តែម្តងទើបផ្អើលឆោឡោ។
ដឹងថាបាត់ជនរងគ្រោះក៏រូតរះទៅប្តឹងដល់សមត្ថកិច្ចនគរបាលអំពីករណីនេះ ហើយពេលទទួលបានដំណឹងនេះ និងស្របតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង និងលោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ឯកស គឹមឡុងអធិការនគរបាលស្រុកមោងឫស្សីបានដឹកនាំធ្វើការស្រាវជ្រាវ និងផ្សព្វផ្សាយដំណឹងនេះដល់នគរបាលស្រុកពាក់ព័ន្ធ នឹងភូមិសាស្រ្តជាប់គ្នារហូតដល់ថ្ងៃទី១៤ ខែ សីហា ឆ្នាំ២០២៣ វេលាម៉ោង ១៣ និង៥០នាទី នៅចំណុចក្រុមទី១ ភូមិខ្នាចអំពរ ឃុំព្រែកជីក ស្រុករុក្ខគីរី ។
សមត្ថកិច្ចនគរបាលស្រុករុក្ខគីរីបានចុះល្បាតនៅចំណុចខាងលើក៏ប្រទះឃើញបុរសម្នាក់ ឈ្មោះស្វាយ ទន់អី ភេទប្រុស អាយុ២៥ឆ្នាំ រស់នៅភូមិសៀម ឃុំព្រែកជីក ស្រុករុក្ខគីរី ជិះម៉ូតូ០១គ្រឿង ម៉ាកសូនិច(ដូចភិនភាគម៉ូតូដែលបានបាត់ដូចខាងលើ) ហើយសមត្ថកិច្ចនគរបាលបានឃាត់មនុស្សនិងម៉ូតូ ធ្វើការសាកសួរទើបដឹងថា បុរសនេះជាអ្នកលួចម៉ូតូរបស់ជនរងគ្រោះនៅស្រុកមោងឫស្សីប្រាកដមែន ហើយពេលនោះក៏ទំនាក់ទំនងបញ្ជូនមកកាន់អធិការដ្ឋាននគរបាលស្រុកមោងឫស្សី ដែលជាម្ចាស់ករណីដើម្បីចាត់ការតាមនីតិវិធីច្បាប់ រីឯម៉ូតូបានប្រគល់ជូនជនរងគ្រោះវិញ៕
.jpg?1692090445)
.jpg?1692090452)
