រាជធានីភ្នំពេញ ៖ កម្លាំងនាយកដ្ឋានប្រឆាំងការជួញដូរមនុស្សនិងការពារអនីតិជននៃអគ្គស្នងការនគរបាលជាតិ នៅវេលាម៉ោងជិត៩យប់ ថ្ងៃទី១៤ ខែសីហា ឆ្នាំ២០២៣ បានធ្វើការឆ្មក់បង្ក្រាបហាងកាហ្វេចំនួន ៥កន្លែង ជាប់ៗគ្នា ដែលលួចបង្កប់នូវសេវាបម្រើផ្លូវភេទ ឃាត់ខ្លួនបានមនុស្សជាច្រើននាក់ ។
ប្រតិបត្តិការនេះ ធ្វើឡើងនៅម្តុំត្រឡោកបែក ដែលមានទីតាំងតាមបណ្តោយផ្លូវ៥៩៨ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ជុំវិញប្រតិបត្តិការនេះដែរ សមត្ថកិច្ចបញ្ជាក់ថា មុននឹងឈានដល់ការបង្ក្រាបនេះ សមត្ថកិច្ចជំនាញ ទទួលបានសេចក្តីរាយការណ៍ពីប្រជាពលរដ្ឋ ថាទីតាំងហាងកាហ្វេទាំងនេះ សុទ្ធតែលួចបង្កប់នូវសេវាបម្រើផ្លូវភេទ លុះពេលសមត្ថកិច្ចចុះទៅដល់ ក៏បានឃាត់ខ្លួនមនុស្ស ១៦នាក់ ក្នុងនោះមាន៤នាក់ ជាម្ចាស់ទីតាំង ដោយឡែក ១២នាក់ទៀត ជានារីដែលបម្រើសេវាផ្លូវភេទ និងបានរកឃើញស្រោមអនាម័យប្រើប្រាស់រួចមួយចំនួន និងមិនទាន់ប្រើប្រាស់មួយចំនួនផងដែរ ។
ពេលនេះ ចំពោះនារីទាំង១២នាក់ ត្រូវបានត្រូវបានបញ្ជូនទៅមន្ទីរសង្គមកិច្ច ខណៈ៤នាក់ទៀតជាម្ចាស់ទីតាំង និងវត្ថុតាង ត្រូវបានបញ្ជូនទៅនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ ដើម្បីចាត់ការបន្តតាមនិតិវិធីច្បាប់ ដោយឡែកហាងទាំង៥ខាងលើ ត្រូវបានបិទឃ្លុំបេជាបណ្តោះអាសន្ន ៕ នុច
.jpg?1692091094)
