រាជធានីភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង អាចនិយាយបានថាជាករណីកម្ររនឹងកើតមានក្នុងរាជធានីភ្នំពេញ ខណៈមេឃបើកថ្ងៃក្តៅហែង ស្រាប់តែមានរន្ទះបាញ់ បានបាញ់ចាំហោជាងផ្ទះ លាន់តែផាំង ធ្លាក់ក្បឿង មកចំរថយន្តស៊េរីទំនើប Bently មួយគ្រឿង រងការខូចខាត កាលពីវេលាម៉ោងជាង៣រសៀល ថ្ងៃទី១៥ ខែសីហា ឆ្នាំ២០២៣ នៅចំណុច ផ្លូវ២០០២ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
តាមសម្តីបងប្អូនប្រជាពលរដ្ឋ នៅក្បែរចំណុចកើតហេតុ បានឲ្យដឹងថា មុនពេលកើតហេតុ មេឃបើកថ្ងៃក្តៅហែង ពេលនោះស្រាប់តែលាន់ផាំង យ៉ាងខ្លាំង ដោយរន្ទះបាញ់ បានបាញ់ត្រូវចំហោជាងផ្ទះមួយកន្លែង ធ្លាក់ក្បឿងចុះមកក្រោម មកត្រូវចំ រថយន្តស៊េរីទំនើប Bently ប្រេះកញ្ចក់ផ្នែកខាងមុខ រងការខូចខាត និងធ្លាក់ចំ យ៉ផ្ទះធ្លុះ ២ ៣កន្លែងផងដែរ សំណាងណាស់មិនត្រូវចំមនុស្ស ។
មិនតែប៉ុណ្ណោះ ប្រជាពលរដ្ឋបានបញ្ជាក់ទៀតថា នេះជាលើកទី២ហើយ ដោយលើកទី១ កន្លងទៅរន្ទះបាញ់ បានបាញ់នៅទល់មុខផ្ទះកើតហេតុនេះ លុះលើកទី២ ក៏បាញ់ចំហោជាង លើដំបូងផ្ទះ នេះតែម្តង ។
ក្រោយកើតហេតុ ម្ចាស់រថយន្តស៊េរីទំនើប Bently បានត្រឹមតែបើករថយន្តចេញពីទីតាំងកើតហេតុ រួចយករថយន្តទៅជួសជុលដោយខ្លួនឯងប៉ុណ្ណោះ ជុំវិញករណីបាតុភូតធម្មជាតិខាងលើ ៕ #N
