ខេត្តកំពង់ស្ពឺ៖ វីដេអូពីកាមេរ៉ាសុវត្ថិភាព ថតបានស្តែងៗ ខណៈបុរស២នាក់ ជិះម៉ូតូលឿនខ្លាំងណាស់ មិនដឹងប្រញាប់ទៅណានោះទេ បានជ្រុលមកបុកប៉ារ៉ាស់ ដែលគេទម្លាក់ដាក់ បាំងដើម្បីឲ្យរថភ្លើងឆ្លងកាត់ ពេញទំហឹង ដាច់ចេញពីបង្គោល ផ្លោងទៅទាំងមនុស្សទាំងម៉ូតូទៅប៉ះបារ៉ាស់ម្ខាងទៀត សំណាងណាស់មិនស្លាប់ គ្រាន់តែរងរបួសស្រាល ។

ហេតុការណ៍នេះបានកើតឡើងកាលពីវេលាម៉ោង ៤និង ៤០នាទី​ល្ងាច ថ្ងៃទី២០ ខែសីហា ឆ្នាំ២០២៣ នៅចំណុចនៅ​លើផ្លូវ​លេខ១៣០ ត្រងចំណុចភូមិព្រៃទទឹង ឃុំព្រះនិព្វាន ស្រុកគងពិសី ខេត្តកំពង់ស្ពឺ ។

តាមរបាយការណ៍ពីសមត្ថកិច្ចបានឲ្យដឹងថា ម៉ូតូដែលជិះមកបុកនេះ គឺម៉ាក​ HONDA ស៊េរី​ឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ​1JH-78​74 បើកបរដោយឈ្មោះ ស៊ើប ហឿន ភេទប្រុស អា​យុ៣៥ឆ្នាំ នៅភូមិមល់ ឃុំរកាត ស្រុកភ្នំក្រវ៉ាញ ខេត្តពោធិ៍សាត់ ឌុបបុរសម្នាក់ទៀត នៅពីក្រោយ លុះមកដល់ចំណុចខាងលើ បានជិះម៉ូតូបុកបារ៉ាស់ការពារផ្លូវរថភ្លើងឆ្លងកាត់ បណ្ដាលឲ្យបាក់ដាច់ចេញពីបង្គោល ស្របពេលរថ​ភ្លើងជិតមកដល់តែម្តង ។ សំណាងណាស់គ្រាន់តែរងរបួសស្រាល ត្រូវបានបងប្អូនសាច់ញាតិ បញ្ជូនទៅមន្ទីរពេទ្យ ។

ចំណែកម៉ូតូ ត្រូវបានសមត្ថកិច្ច យកទៅរក្សាទុកនៅប៉ុស្តិ៍នគរបាលរដ្ឋបាលព្រះនិព្វាន ដើម្បីដោះស្រា​យតាមនីតិវិធី៕ មេសា