រាជធានីភ្នំពេញ ៖ រថយន្ត ២គ្រឿង បានរងការខូចខាតយ៉ាងដំណំ ខណៈកំពុងបើកបរសុខៗ ស្រាប់តែមានរថយន្តដឹកស៊ីម៉ង់ត៍មួយគ្រឿង ជ្រុលចង្កូតមកបុកឡើងសួនច្បារចែកទ្រូងផ្លូវ រួចផ្អៀងក្រឡាប់សង្កត់លើរថយន្តទាំង២គ្រឿងនេះ តែម្តង សំណាងណាស់មនុស្សមិនអី​។

ហេតុការណ៍នេះ បានកើតឡើងនៅវេលាម៉ោង ៦និង ៣០នាទី ព្រឹក ថ្ងៃទី ២១ ខែសីហា ឆ្នាំ២០២៣ នៅចំណុចមហាវិថីឈ្នះៗ ហៅផ្លូវកប់ស្រូវ ក្នុងភូមិជម្ពូវ័ន្ត២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ រថយន្តដឹកស៊ីម៉ង់ត៍មួយគ្រឿង ពាក់ស្លាកលេខ ព្រះសីហនុ 3A-6166 បើកបរក្នុងល្បឿនលឿន តាមបណ្តោយផ្លូវកប់ស្រូវខាងលើ ពីជើងទៅត្បូង លុះដល់ចំណុចកើតហេតុ ក៏បានបុកឡើងលើសួនច្បារចែកទ្រូងផ្លូវ រួចផ្អៀងក្រឡាប់ សង្កត់លើរថយន្តទាំង២គ្រឿងកំពុងបើកស្របគ្នា ១គ្រឿងម៉ាកកូរ៉ូឡា និងមួយគ្រឿងម៉ាក ម៉ាស្តាធូ បណ្តាលឲ្យរងការខូចខាតយ៉ាងដំណំតែម្តង សំណាងណាស់ អ្នកជិះក្នុងរថយន្តមិនអី​។

ក្រោយកើតហេតុ សមត្ថកិច្ចប៉ុស្តិ៍ចោមចៅ៣ សហការជាមួយនគរបាលចរាចរណ៍ខណ្ឌពោធិ៍សែនជ័យ និងនគរបាលចរាចរណ៍ក្រុង បានចុះមកធ្វើការវាស់វែង យករថយន្តទាំង៣គ្រឿង ទៅរក្សាទុក រង់ចាំដោះស្រាយគ្នាតាមច្បាប់បន្តទៀត ៕ អែល វិចិត្រ