រាជធានីភ្នំពេញ ៖ រថយន្ដ Mercedes C300 ស៊េរីទំនើប មួយគ្រឿង បានរងការខូចខាតយ៉ាងដំណំ ក្រោយរេចង្កូតទៅបុករបាំងថ្មចែកផ្លូវ ទាំងកំរោល បណ្ដាលរថយន្ដក្រឡាប់ផ្ងារជើងឡើងលើ ផ្អើលប្រជាពលរដ្ឋ កាលពីវេលាម៉ោង ៣យប់ឈានចូលថ្ងៃទី ២២ ខែសីហា ឆ្នាំ២០២៣ នោចំណុចផ្លូវសហព័ន្ធរុស្ស៊ី ក្នុងសង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មាន ពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញ បុរសម្នាក់ បើករថយន្ដ Mercedes C300 ស៊េរីទំនើប មួយគ្រឿង គ្មានស្លាកលេខ បើកតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីជើងទៅត្បូង មកដល់មុខព្រលានយន្ដហោះ ក៏បើកទៅបុករបាំងថ្មចែកផ្លូវ ទាំងកំរោល បណ្ដាលរថយន្ដក្រឡាប់ផ្ងារជើងឡើងលើ ត្រូវបានបងប្អូនប្រជាពលរដ្ឋ ជួយទាញអ្នកបើកបរចេញពីក្នុងរថយន្ដ ។
ចំណែករថយន្តខាងលើ ត្រូវបានសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វើការវាស់វែង យករថយន្តទៅរក្សាទុក ដើម្បីរង់ចាំដោះស្រាយនៅពេលក្រោយ តាមច្បាប់បន្តទៀត ៕ Mrr Ka
