រាជធានីភ្នំពេញ៖ ករណីហិង្សាមួយបានកើតឡើង ដោយជនសង្ស័យ២ក្រុម បានបើកដេញកាប់គ្នាផ្អើលពេញផ្លូវ រហូតមានអ្នករបួសធ្ងន់ ។ នេះបើយោងតាមផេក អគ្គស្នងការដ្ឋាននគរបាលជាតិ ។

ហេតុការណ៍នេះបានកើតឡើងនៅវេលាម៉ោង ១០យប់ ថ្ងៃទី២០ ខែសីហា ឆ្នាំ២០២៣ នៅមុខផ្ទះលេខ២៧ ផ្លូវលេខ៤១០ ក្រុមទី៣ ភូមិ១ សង្កាត់បឹងត្របែក ខណ្ឌចំការមន រាជធានីភ្នំពេញ ។

សមត្ថកិច្ចបានឲ្យដឹងថា ករណីនេះ មានក្រុមជនសង្ស័យជិះម៉ូតូចំនួន ១០គ្រឿង មនុស្សប្រហែល២០នាក់ ប្រដាប់ដោយដាវ និងកាំបិត ស្ទុះមកកាប់ភាគីម្ខាងទៀត ដែលមានមនុស្សប្រហែល៦នាក់ នៅទីតាំងខាងលើ។

ក្រោយធ្វើសកម្មភាពរួច ក៏បណ្តាលអោយរបួសឈ្មោះ ច្រិច សុខរីម ភេទប្រុស អាយុ២០ឆ្នាំ ជនជាតិ ខ្មែរ ដែលស្នាក់នៅផ្ទះលេខ៣២ ផ្លូវលេខ៤៣២ សង្កាត់ទួលទំពូងទី២ ខណ្ឌចំការមន មានមុខរបរ ជាងកាំមេរ៉ា (របួសប្រអប់ដៃឆ្វេងធ្ងន់)។

ពេលនេះ ជនរងគ្រោះ កំពុងសម្រាកនៅមន្ទីពេទ្យ សុងការណ៍ ហើយកម្លាំងសមត្ថកិច្ចជំនាញ កំពុងស្រាវជ្រាវ ៕