ខេត្តក្រចេះ ៖ មិនចេះអាណិតម៉ែឪសោះ ម៉ែឪខំរកលុយទិញម៉ូតូល្អៗឲ្យជិះ មិនខំថែ មិនខំរៀន បែរជាប្រមូលបក្ខពួក ជិះម៉ូតូលឿនតាមផ្លូវ រួចមានទាំងអ្នកលើកបង្ហោះ មានអ្នកអប មានអ្នកថត សម្ញ៉ែងគេគិតថា អញឡូយ មានអីត្រូវបានសមត្ថកិច្ច នៃអធិការដ្ឋាននគរបាលក្រុងក្រចេះ ស្រាវជ្រាវឃាត់ខ្លួនបាន ។ នេះបើយោងតាមផេក ស្នងការដ្ឋាននគរបាលខេត្តក្រចេះ ។

ការបង្ក្រាបនេះ គឺអនុវត្តតាមបទបញ្ជាយ៉ាងម៉ឺងម៉ាត់របស់ លោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ ដោយកម្លាំងនគរបាលនៃអធិការដ្ឋានក្រុងក្រចេះ នៅថ្ងៃទី១៩​ ខែសីហា​ ឆ្នាំ២០២៣​ ​បានធ្វើការបង្ក្រាបសកម្មភាពក្មេង ទំនើងមួយក្រុមមានគ្នា ចំនួន៩នាក់ ដែលបានធ្វើសកម្មភាពជិះម៉ូតូបង្ហោះយ៉ាងអណាធិបតេយ្យ​ ធ្វើអោយប៉ះពាល់សណ្តាប់ធ្នាប់តាមផ្លូវសាធារណៈ​ក្នុងក្រុងក្រចេះ។

ចំពោះក្មេងទំនើងទាំង៩នាក់ ត្រូវបាននាំខ្លួនមកកាន់អធិការដ្ឋាននគរបាលក្រុងក្រចេះ និងត្រូវបានធ្វើការអប់រំណែនាំ និងធ្វើកិច្ចសន្យាប្រគល់អោយអាណាព្យាបាលយកទៅអប់រំណែនាំបន្ត ៕