រាជធានីភ្នំពេញ ៖ ប្រជាពលរដ្ឋឃាត់បានជនសង្ស័យម្នាក់ ដែលបានធ្វើសកម្មភាពឆក់គេ តែមិនបានសម្រេច ហើយត្រូវបានបងប្អូនប្រជាពលរដ្ឋវាយស្វាគមន៍ចាស់ដៃ ទើបប្រគល់ឲ្យសមត្ថកិច្ច កាលពីវេលាម៉ោង ៩យប់ ថ្ងៃទី១៥ ខែធ្នូ ឆ្នាំ២០២៣ នៅចំណុចកុងស៊ីកាប់គោ ក្នុងសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។
តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញជនសង្ស័យ៤នាក់ ជិះម៉ូតូឌ្រីមសេ១២៥ ២គ្រឿង ជិះចូលក្នុងកុងស៊ីកាប់គោ ដោយបានជិះតាមអ៊ុំស្រីម្នាក់ ស្ពាយកាបូប ភ្លាមនោះជនសង្ស័យក៏បានធ្វើសកម្មភាពលូកដៃឆក់អ៊ុំស្រីខាងលើ តែមិនបានសម្រេច ភ្លាត់ស្នៀតដួលម៉ូតូ ហើយត្រូវបានបងប្អូនប្រជាពលរដ្ឋដែលនៅក្នុងតំបន់កុងស៊ីកាប់គោនោះ វាយស្វាគមន៍ម្នាក់មួយដៃ មួយជើង បណ្ដាលឲ្យសន្លប់ស្ដូកស្ដឹងម្នាក់ ខណៈជនសង្ស័យ៣នាក់ទៀត បាននាំគ្នាជិះរត់គេចខ្លួនបាត់ពីកន្លែងកើតហេតុ។
ក្រោយកើតហេតុសមត្ថកិច្ចក៏បានមកដល់ បាននាំខ្លួនជនសង្ស័យខាងលើ និងអ៊ុំស្រីរងគ្រោះ ទៅប៉ុស្តិ៍រដ្ឋបាលសង្កាត់បាក់ខែង ដើម្បីដាក់ពាក្យបណ្ដឹងនឹងធ្វើតាមនីតិវិធីច្បាប់ ៕ Mrr Ka
