រាជធានីភ្នំពេញ ៖ រថយន្ដឡិចស៊ីស RX400h មួយគ្រឿងបើកបុករបាំងថ្មចែកទ្រូងផ្លូវ បណ្ដាលឲ្យរងការខូចខាត ហើយក៏មានរថយន្ដ ALPHARD បើកមករថយន្តឡិចស៊ីសបន្ថែមទៀត បណ្ដាលឲ្យរងការខូចខាតយ៉ាងដំណំ។
ហេតុការណ៍នេះបានកើតឡើងនៅតាមបណ្ដោយផ្លូវសហព័ន្ធរុស្ស៊ី (ស្តុបក្ដាន់ពីរ) សង្កាត់ស្រះចក ខណ្ឌដូនពេញ វេលាម៉ោង២យប់ឈានចូល ថ្ងៃទី១៨ ខែធ្នូ ឆ្នាំ២០២៣។
តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញរថយន្ដឡិចស៊ីស RX400h ពាក់ស្លាកលេខ ភ្នំពេញ 2BS-5285 បើកតាមបណ្ដោយផ្លូវសហព័ន្ធរុស្សី ក្នុងទិសដៅពីកើតមកលិច មកដល់ស្ដុបក្ដាន់ពីរ មកបុករបាំងថ្មចែកទ្រូងផ្លូវទាំងកម្រោល បណ្ដាលឲ្យរបាំងថ្មខូចខាតចំនួន៣កង់ កាត់ទទឹងផ្លូវ។ ភ្លាមនោះក៏មានរថយន្ដ ALPHARD ពាក់ស្លាកលេខ ភ្នំពេញ 2BI-0655 មួយគ្រឿងទៀត បើកបរដោយជនជាតិចិន មកបុករថយន្តឡិចស៊ីសបន្ថែមទៀត បណ្ដាលអោយរងការខូចខាតយ៉ាងដំណំ ។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែង យករថយន្ដទាំង២គ្រឿងទៅរក្សាទុក រង់ចាំការដោះស្រាយនៅពេលក្រោយ តាមច្បាប់បន្តទៀត ៕ Mrr Ka
