រាជធានីភ្នំពេញ ​៖ ​ ឪពុក និងសាច់ញាតិបងប្អូនទ្រហ៊ោយំបោកខ្លួនមិនអាចទទួលយកបាន ខណៈយុវជនម្នាក់ចេញពីហូបចុកជួបជុំគ្រួសារ ទាញម៉ូតូជិះចេញក្រៅ ឪពុកហាមហើយក៏មិនស្តាប់ អកុសលបែរជាមកជួបគ្រោះថ្នាក់ចរាចរណ៍ ជិះម៉ូតូមកបុកចំចំហៀងកង់បីមួយគ្រឿង ដែលកំពុងបើកដោយជនពិការម្នាក់ បណ្តាលឲ្យស្លាប់យ៉ាងអាណោចអាធ័មតែម្តង ។

ហេតុការណ៍នេះបានកើតឡើងកាលពីវេលាម៉ោង ១៣និង៤០នាទី ថ្ងៃទី១៧ ខែធ្នូ ឆ្នាំ២០២៣ ត្រង់ចំណុចផ្លូវលេខ២១៧ ខាងត្បូងផ្សារព្រែកជ្រៃ ស្ថិតក្នុងភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង ខណៈមុនពេលកើតហេតុ ម៉ូតូ ម៉ាក HONDA C125 ពណ៌ខ្មៅ ពាក់ផ្លាកលេខ ភ្នំពេញ 1JX-8670 បើកបរដោយឈ្មោះ ប្រុស គឹមហេង ភេទប្រុស អាយុ ១៩ឆ្នាំ មុខរបរកម្មកររោងចក្រ មានទីលំនៅភូមិត្រយឹង ឃុំរាមអណ្ដើក ស្រុកគីរីវង់ ខេត្តតាកែវ បើកបរលឿនខ្វះការប្រុងប្រយ័ត្ន និងម៉ូតូកង់បី ពណ៌ក្រហម ពាក់ស្លាកលេខ ភ្មំពេញ 1JH-9141 បើកបរដោយឈ្មោះ ឆេង សំអាត ភេទប្រុស អាយុ៤១ឆ្នាំ មុខរបរលក់ដូរ មានទីលំនៅភូមិ១ សង្កាត់បឹងត្របែក ខណ្ឌចំការមន រាជធានីភ្នំពេញ ក្នុងទិសដៅស្របទិសគ្នា ពីត្បូងទៅជើង ពេលមកដល់ចំណុចកើតហេតុ ម៉ូតូក៏បានបុកម៉ូតូកង់បីពីក្រោយចំហៀងខាងស្តាំ បណ្តាលអោយបោកដួលស្លាប់នៅន្លែងកើតហេតុតែម្តង។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌដង្កោ សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យកម៉ូតូនិងរម៉កទៅរក្សាទុក នៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល វិចិត្រ