រាជធានីភ្នំពេញ ៖ សាច់ញាតិមកដល់ទ្រហ៊ោយំបោកខ្លួន មិនអាចទទួលយកបាន ខណៈដែលបុរសម្នាក់ ជិះម៉ូតូ YAMAHA NOUVO មួយគ្រឿងតាមផ្លូវ ត្រូវបានរថយន្ដកុងតឺន័រ បើកកៀររួចកិនបណ្ដាលឲ្យម្ចាស់ម៉ូតូ ស្លាប់ភ្លាមៗយ៉ាងរន្ធត់ កាលពីវេលាម៉ោង ៩យប់ ថ្ងៃទី២០ ខែធ្នូ ឆ្នាំ២០២៣ នៅចំណុចផ្លូវលេខ២០១១ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូ YAMAHA NOUVO ពាក់ស្លាកលេខ ភ្នំពេញ 1HE-2699 តាមបណ្ដោយផ្លូវ២០១១ ក្នុងទិសដៅពីជើងមកត្បូង លុះមកដល់ចំណុចកើតហេតុក៏ត្រូវរថយន្ដកុងតឺន័រ ពាក់ស្លាកលេខ ភ្នំពេញ 3D-0559 របស់ក្រុមហ៊ុន L.M.H ដឹកជញ្ជូន ដែលបើកស្របគ្នាកៀរ ធ្លាក់មនុស្សចូលក្រោមកង់រថយន្ដ រួចកិនម្ចាស់ម៉ូតូស្លាប់ ភ្លាមៗយ៉ាងរន្ធត់ ខណៈរថយន្តចេញពីកន្លែងកើតហេតុ ទៅដល់ផ្លូវស្ងាត់ ក៏បើកទ្វាររថយន្តរត់គេចខ្លួនបាត់ស្រមោលតែម្តង ។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែងយករថយន្ដនិងម៉ូតូទៅរក្សាទុក រង់ចាំការដោះស្រាយនៅពេលក្រោយតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ Mrr Ka
