រាជធានីភ្នំពេញ ៖ ពិតជារន្ធត់ណាស់ ខណៈបុរសម្នាក់ បានទម្លាក់ទម្លាក់បែនរថយន្តចុះខ្វះការប្រុងប្រយ័ត្ន ក៏សង្កត់ទៅលើបុរសម្នាក់ទៀត ដែលត្រូវជាបងប្អូនថ្លៃនឹងគ្នា បណ្តាលឲ្យស្លាប់យ៉ាងរន្ធត់ភ្លាមៗនៅនឹងកន្លែង ។

ហេតុការណ៍នេះបានកើតឡើងកាលពីវេលាម៉ោង ១១និង២៥ នាទីថ្ងៃទី២២ ខែធ្នូ ឆ្នាំ២០២៣ លើផ្លូវលេខ១៥១ ភូមិបឹង សង្កាត់ពញ្ញាពន់ ខណ្ឌព្រែកព្នៅ រាជធានីភ្នំពេញ។ នេះបើយោងតាមរបាយការណ៍របស់ Hotline 117 ប្រចាំបញ្ជាររបស់អគ្គស្នងការដ្ឋាននគរបាលជាតិ ។

សមត្ថកិច្ចបានបញ្ជាក់ថា ក្រោយពីទទួលបានព័ត៌មាននេះភ្លាម កម្លាំងជំនាញបានចុះដល់កន្លែងកើតហេតុ ធ្វើការពិនិត្យ ខណៈជនបង្កត្រូវបានឃាត់ខ្លួន ជាមួយនិងវត្ថុតាង កសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី ។

សូមបញ្ជាក់ថា ជនបង្ក និងជនរងគ្រោះ ត្រូវជាបងប្អូនថ្លៃនឹងគ្នា បើករថយន្តដល់កន្លែងកើតហេតុខាងលើបាន ឈប់រថយន្ត ហើយបែនលើកទ្រុងចោល រួចដើរទៅហូបបាយ ។ ពេលត្រឡប់មកវិញជនរងគ្រោះ បានអើតមើលគ្រឿងក្រោមរថយន្ត (ផ្នែកខាងស្តាំ) ឯជនបង្កឡើងបញ្ឆេះរថយន្តរួចទម្លាក់បែនចុះ វិញ (ផ្នែកខាងឆ្វេង) បណ្តាលឲ្យសង្កត់ស្លាប់ជនរងគ្រោះតែម្តង ។

តាមការបញ្ជាក់របស់នគរបាលការិយាល័យបច្ចេកទេសវិទ្យាសាស្ត្រ និងលោកឧកញ៉ាបណ្ឌិត និង សុវណ្ណរ័ត្ន នៃស្នងការដ្ឋាននគរបាលរាជធានី ភ្នំពេញ បញ្ជាក់ថាជនរងគ្រោះបានស្លាប់ដោយទម្លាក់បែនរថយន្តសង្កត់ពិតមែន ។

ពេលនេះ សព ត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី ៕