រាជធានីភ្នំពេញ ៖ កីឡាករប្រដាល់គុនខ្មែរមានឈ្មោះថា ម៉ានូ បានបើករថយន្ត lexus nx 200t មួយគ្រឿង ជ្រុលចង្កូតបុករបងផ្ទះប្រជាពលរដ្ឋ បណ្ដាលឲ្យរងការខូចខាតយ៉ាងដំណំ កាលពីវេលាម៉ោង ៤ទៀបភ្លឺត្រូវនឹងថ្ងៃទី២៤ ខែធ្នូ ឆ្នាំ២០២៣ តាមបណ្ដោយផ្លូវ៥៩២ ស្ថិតនៅក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញជនបរទេសម្នាក់ ដែលជាកីឡាករប្រដាល់គុនខ្មែរ ដែលល្បីនៅពាក្យ «អាណាខ្លាំង ចូលមោ! » ដែលមានឈ្មោះថា ម៉ានូ បានបើករថយន្តប្រភេទ lexus nx200 tមួយគ្រឿង ដែលពាក់ស្លាកលេខ កម្ពុជា PPH 53235 ធ្វើដំណើរតាមបណ្ដោយផ្លូវ ៥៩២ ក្នុងទិសដៅពីកើតមកលិច មកដល់ចំណុចកើតហេតុ ក៏បើកគេចរថយន្ដធន់ធំមួយគ្រឿង ហើយរេចង្កូតទៅបុករផ្ទះប្រជាពលរដ្ឋ បណ្ដាលឲ្យរងការខូចខាតយ៉ាងដំណំ តែសំណាងគ្មាននរណាម្នាក់រងរបួសនោះទេ ។

ក្រោយកើតហេតុ កីឡាករប្រដាល់គុនខ្មែរ ម៉ានូ ក៏បានចេញថ្លៃសងការខូចខាតទៅម្ចាស់ផ្ទះ ដើម្បីបញ្ចប់រឿងនៅទីតាំងកន្លែងកើតហេតុ ៕ Mrr Ka