ខេត្តតាកែវ ៖ ជនសង្ស័យម្នាក់ ធ្វើសកម្មភាព គាស់ទម្លុះទម្លាយចូលលួចយកសម្ភារៈ នៅចំណុចកន្លែងវេរលុយវីង ត្រូវបាននគរបាលស្រុកត្រាំកក់ ខេត្តតាកែវ ធ្វើការឃាត់ខ្លួនបាន កាលពីវេលាម៉ោង១ យប់ឈានចូលថ្ងៃទី២៤ ខែធ្នូ ឆ្នាំ២០២៣ នៅចំណុចភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ។ នេះបើយោងតាមផេក អធិការដ្ឋាននគរបាលស្រុកត្រាំកក់។

សមត្ថកិច្ចបានឲ្យដឹងថា ជនសង្ស័យមានឈ្មោះ វន័ ទិ ភេទប្រុស​ អាយុ២២ឆ្នាំ នៅភូមិទន្លេនាម ឃុំចំប៉ី ស្រុកអង្គរជ័យ ខេត្តកំពត បានធ្វើសកម្មភាពកាត់សោរចូលលួចយកសម្ភារៈរបស់ប្រជាពលរដ្ឋឈ្មោះ ញ៉ិល សុភកញ្ញា ភេទស្រី អាយុ ៣១ឆ្នាំ នៅភូមិធ្នង់រលើងឃុំលាយបូរ ស្រុកត្រាំកក់ ខេត្តតាកែវ តែត្រូវម្ចាស់ភ្ញាក់ទាន់លួចយកមិនបានសម្ភារៈអ្វីឡើយ។

ក្រោយពីបានទទួលពាក្យបណ្ដឹងរបស់ជនគ្រោះសមត្ថកិច្ចបានចុះធ្វើការស្រាវជ្រាវកសាងសំណុំរឿងទៅតាមនីតិវិធី

បន្ទាប់ពីទទួលបានពាក្យបណ្ដឹងនឹងធ្វើការស្រាវជ្រាវយ៉ាងយកចិត្តទុកដាក់របស់ ផ្នែកជំនាញនៃអធិការដ្ឋាននគរបាលស្រុកត្រាំកក់ដែលដឹកនាំបញ្ជាដោយលោកវីរៈឯក ឌុក ធីយ៉ា អធិការនៃអធិការដ្ឋាននគរបាលស្រុកត្រាំកក់ ទើបកំណត់មុខសញ្ញាបាន។

ដោយមានបទបញ្ជាពីលោកឧត្តមសេនីយ៍ទោស្នងការព្រមទាំងដឹកនាំសម្របសម្រួលនីតិវិធីដោយដោយ ឯកឧត្តម ព្រះរាជអាជ្ញា នៅថ្ងៃទី២៤ខែធ្នូឆ្នាំ ២០២៣វេលាម៉ោង៥ល្ងាច សមត្ថកិច្ចបានធ្វើការឃាត់ខ្លួនជនសង្ស័យ នៅចំណុចពី ខាងក្រោយផ្ទះជនសង្ស័យ ស្ថិតក្នុងភូមិទន្លេនាម ឃុំចំប៉ីស្រុកអង្គរជ័យ រួមនិងវត្ថុតាងម៉ូតូ c125 ពណ៌ខ្មៅ០១គ្រឿង ដើម្បីយកមកធ្វើការសាកសួរ។

បន្ទាប់ពីធ្វើការសាកសួរជនសង្ស័យឆ្លើយសារភាពថាខ្លួន និងបក្ខពួកចំនួនពីរនាក់ទៀតមានឈ្មោះ ហាក់ វាយោ ភេទប្រុសអាយុ ១៦ឆ្នាំ និងឈ្មោះ ហាក់ វេហា ភេទប្រុស អាយុ ២០ឆ្នាំនៅ ភូមិទន្លេនាម ឃុំចំប៉ី ស្រុកអង្គរជ័យ ខេត្តកំពត បានធ្វើសកម្មភាពយកទុល្វីស និងដែកកងសម្រាប់ដាក់កូនសោរគាស់នឹងឆ្កឹះសោរ ចូលលួចសម្ភារៈតាមកន្លែងវេលុយវីងនិងតាមផ្ទះនៅទីប្រជុំជនបានចំនួន ០៨ ករណីរួមមាន៖

-នៅថ្ងៃទី ១១ខែកញ្ញាឆ្នាំ ២០២៣វេលាម៉ោង ២៤.០០ឈ្មោះ វន័ ទិ និងបក្ខពួកបានយកទុល្វីសគាស់សោរចូលលួចយកសម្ភារៈនៅកន្លែងវីង នៅភូមិព្រៃស្រោង ឃុំអង្គតាសោម បានរង្វាន់ក្រវិលកំប៉ុងស្រាបៀរលក់បានប្រាក់ចំនួន ៥០ ម៉ឺនរៀល។

-នៅថ្ងៃទី ២១ខែកញ្ញា ឆ្នាំ២០២៣ វេលាម៉ោង២៤.០០ នៅចំណុចផ្សារអង្គតាសោមខ្លួននិងបក្ខពួកបានធ្វើសកម្មភាពគាស់សោរចូលលួចសម្ភារៈ កន្លែងវេលុយវ៉ីង តែយកពុំបានសម្ភារៈអ្វីឡើយ។

-នៅថ្ងៃទី២១ ខែវិច្ឆិកាឆ្នាំ ២០២៣ វេលាម៉ោង២៤.០០នាទី ខ្លួនបានធ្វើសកម្មភាពយកទុល្វីសគាស់តូបកន្លែងវេលុយវ៉ីងលួចយកបានទូរសព្ទចំនួន ០២គ្រឿង នៅភូមិត្រពាំងរំពាក់ ឃុំត្រាំកក់ យកទៅលក់បានប្រាក់ចំនួន៧០ ដុល្លារ។

-នៅថ្ងៃទី ២៥ ខែវិច្ឆិកាឆ្នាំ ២០២៣ម៉ោង ២៤.០០នាទី ខ្លួននិងបក្ខពួកបានធ្វើសកម្មភាពយកទុល្វីសគាស់សោរកន្លែងវេលុយវ៉ីងនៅភូមិឬស្សីស្រុក ឃុំញ៉ែងញ៉ង យកបានទូរសព្ទចំនួន ០៩គ្រឿង។

-នៅថ្ងៃទី ១៦ខែធ្នូឆ្នាំ ២០២៣វេលាម៉ោង ២៤.០០នាទី ខ្លួនបានធ្វើសកម្មភាពគាស់កន្លែងវេរលុយវ៉ីង ក្នុងផ្សារអង្គតាសោម ស្ថិតភូមិអង្គតាសោម ឃុំអង្គតាសោម យកបានបារីម៉ាយសេវ៉ែនចំនួន ០៨ សុង យកទៅលក់បានប្រាក់ចំនួន ៣០ម៉ឺនរៀល។

-នៅថ្ងៃទី ២១ ខែធ្នូឆ្នាំ ២០២៣ វេលាម៉ោង ២៤.០០នាទី ខ្លួននិងបក្ខពួកបានធ្វើសកម្មភាពគាស់ចូលលួចកន្លែងវ៉ីងនៅក្រុងដូនកែវខេត្តតាកែវ តែយកមិនបានសម្ភារៈអ្វីឡើយ។

-នៅថ្ងៃទី ២២ខែធ្នូឆ្នាំ ២០២៣ វេលាម៉ោង ២៤. ០០នាទី ខ្លួននិងបក្សពួកបានធ្វើសកម្មភាពគាស់សោកន្លែងលក់កុំព្យូទ័រនៅផ្សារតាកែវស្ថិតក្នុងក្រុងដូនកែវ តែលួចពុំបានសម្ភារៈអ្វីឡើយ។

-នៅថ្ងៃទី ២៤ ខែធ្នូឆ្នាំ ២០២៣វេលាម៉ោង១.០០រំលងអាធ្រាតុខ្លួនបានធ្វើសកម្មភាពគាស់សោចូលលួចសម្ភារៈនៅកន្លែងវ៉ីងវេរលុយរបស់ឈ្មោះ ញ៉ិល សុភកញ្ញា ភេទស្រីអាយុ ៣១ ឆ្នាំស្ថិតនៅក្នុងភូមិធ្នង់រលើងឃុំលាយបូរស្រុកត្រាំកក់ ខេត្តតាកែវតែត្រូវម្ចាស់គេភ្ញាក់ទាន់ក៏រត់គេច យកពុំបានសម្ភារៈអ្វីឡើយ។

បច្ចុប្បន្នសមត្ថកិច្ចកំពុងធ្វើការសាកសួរនិងកសាងសំណុំរឿងទៅតាមនីតិវិធី៕