រាជធានីភ្នំពេញ ៖ ពិតជាអាណោចអាធ័មណាស់ លោកតាវ័យចំណាស់ កូនៗឲ្យគាត់ឈប់លក់ទៅ ព្រោះឪពុកចាស់ហើយ តែគាត់មិនចេះនៅស្ងៀម សុខចិត្តជិះកង់ដើរលក់ការ៉េមតាមផ្លូវ ស្រាប់ប្រទះឃើញ ស្លាប់ជាប់ជាមួយនឹងកង់ និងធុងការ៉េម ក្នុងគុម្ពព្រៃប្រឡាយទឹក នៅចិញ្ចើមផ្លូវ ទៅវិញ ។
ហេតុការណ៍នេះបានកើតឡើងកាលពីវេលាម៉ោង ៥និង៣០នាទីល្ងាច ថ្ងៃទី២៩ ខែធ្នូ ឆ្នាំ២០២៣ ស្ថិតនៅលើផ្លូវបេតុងក្បែរមាត់ប្រឡាយមួយកន្លែង ក្នុងភូមិភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា សពលោកតាមានឈ្មោះ សុខ ហេង អាយុជាង៦០ឆ្នាំ ប្រកបរបរលក់ការ៉េមជិត៣០ឆ្នាំមកហើយ រស់នៅខេត្តកំពង់ចាម។
ប្រជាពលរដ្ឋបានឲ្យដឹងថា មុនពេលកើតហេតុ គេបានឃើញលោកតាខាងលើ បានធាក់កង់ធុងការ៉េម ដើរលក់នៅតាមភូមិ ក្នុងខណ្ឌពោធិ៍សែនជ័យ ជារៀងរាល់ថ្ងៃ ។ លុះមកដល់វេលាម៉ោង៥និង៣០នាទីល្ងាច ក៏ឃើញលោកតាខាងលើ ធាក់កង់ដើរលក់ការ៉េម តាមបណ្តោយផ្លូវបេតុងមាត់ប្រឡាយ ក្នុងទិសដៅពីកើតមកលិច ដល់ចំណុចកើតហេតុក៏រេចង្កូតធ្លាក់ទាំងកង់ មនុស្សចូលក្នុងមាត់ប្រឡាយទឹកតែម្តង ពេលនោះត្រូវបានប្រជាពលរដ្ឋស្ទុះទៅជួយលើកដែរ តែអកុសល្យគាត់បានស្លាប់ទៅហើយ ។
ក្រោយកើតហេតុ សមត្ថកិច្ចមូលដ្ឋាន សហការជាមួយសមត្ថកិច្ចជំនាញ ធ្វើការហ៊ុំព័ទ្ធទីតាំងកើតហេតុ និងធ្វើកោលស្យវិច័យទៅលើសាកសព បញ្ជាក់ថា សពពិតជាស្លាប់ដោយសារខ្យល់គរ និងបានប្រគល់ឲ្យសាច់ញាតិធ្វើបុណ្យតាមប្រពៃណី៕ មេសា
