រាជធានីភ្នំពេញ ៖ អ៊ុំប្រុសម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈជិះកង់ហាត់ប្រាណ ពេលព្រឹកព្រលឹម ក្នុងបុរីមួយកន្លែង ហើយត្រូវរថយន្តមួយគ្រឿង បើកបុកពីក្រោយ រួចបើករត់គេចខ្លួនបាត់ពីកន្លែងកើតហេតុ ។

ហេតុការណ៍នេះបានកើតឡើងនៅវេលាម៉ោង៦ព្រឹក ថ្ងៃទី៣០ ខែធ្នូ ឆ្នាំ២០២៣ នៅចំណុចក្នុងបុរីមួយកន្លែង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ​។

សមត្ថកិច្ចបានឲ្យដឹងថា អ៊ុំប្រុសដែលត្រូវរថយន្តបុកខាងលើនេះ មានឈ្មោះ លុយ កន ភេទប្រុស អាយុ៥៩ឆ្នាំ អាស័យដ្ឋាននៅក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ ។

ក្រោយកើតហេតុ លោកអធិការនគរបាលខណ្ឌមានជ័យ បានបញ្ជាឲ្យសមត្ថកិច្ចជំនាញចរាចរណ៍ ធ្វើការស្រាវជ្រាវ រហូតតាមរករថយន្តបង្កឃើញ ម៉ាកឡុងគ្រឺស័រ ដែលពាក់ស្លាកលេខ ភ្នំពេញ 2L-8278 និងបញ្ជូន ទាំងកង់របស់អ៊ុំប្រុសខាងលើ ទៅកាន់ ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕ អែល វិចិត្រ