រាជធានីភ្នំពេញ​៖ ម៉ូតូរបស់បងប្អូនកម្មករ កម្មការិនីរោងចក្រជាច្រើនគ្រឿង ត្រូវបានឆេះរងការខូចខាត សល់តែគ្រោងឆ្អឹងប៉ុណ្ណោះ ក្នុងហេតុការណ៍គ្រោះអគ្គិភ័យ ឆាបឆេះរោងចក្រកាត់ដេរ មួយកន្លែង​ បង្កការភ្ញាក់ផ្អើលជាខ្លាំងដល់បងប្អូនប្រជាពលរដ្ឋ ហៅរថយន្តពន្លត់អគ្គិភ័យចេញជួយអន្តរាគមន៍។

ហេតុការណ៍​នេះបានកើតឡើងនៅវេលាម៉ោង​ ១១និង៥០នាទី ថ្ងៃត្រង់ទី០២ ខែមករា ឆ្នាំ២០២៤​ នៅចំណុចរោងចក្រកាត់ដេរ ផ្លូវបេតុង ភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ​។

ភ្លាមៗគេឃើញមានវត្តមានរបស់លោកស្រី គឹម ញឹប អភិបាលខណ្ឌដង្កោ លោកអភិបាលរងខណ្ឌ លោកជឹម ស៊ីថា អធិការនគរបាលខណ្ឌដង្កោ លោកអធិការរង លោកមេប៉ុស្តិ៍ បានចុះមកដល់ទីតាំងកើតហេតុផងដែរ ។

លោកវរសេនីយ៍ឯក​ ព្រហ្ម​ យ៉ន​ នាយការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ នៃស្នងការដ្ឋាននគរបាលរាជធានីភ្នំពេញ​ បានប្រាប់ថា​ ក្រោយពីទទួលបានលេខទូរស័ព្ទរបស់បងប្អូនប្រជាពលរដ្ឋភ្លាម​ លោកបានបញ្ជាទៅរថយន្តពន្លត់អគ្គិភ័យនៅគោលដៅ​ ធ្វើការចេញរថយន្តជួយអ​ន្តរាគមន៍ភ្លាមៗផងដែរ។

លោកវរសេនីយ៍ឯក​ ព្រហ្ម​ យ៉ន​ នាយការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ បានបន្តថា​ ហេតុការណ៍​អគ្គិភ័យឆាបឆេះខាងលើនេះ ត្រូវបានកម្លាំងជំនាញបានធ្វើការអន្តរាគមន៍បាញ់ពន្លត់ឲ្យរលត់ទាំងស្រុងនៅវេលាម៉ោង​ ១២និង៥០នាទីនាថ្ងៃខែឆ្នាំដដែរ​។ ដោយក្នុងនោះប្រើប្រាស់រថយន្តរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ​ នៃស្នងការដ្ឋាននគរបាលរាជធានីភ្នំពេញ ចំនួន០៦គ្រឿង ប្រើប្រាស់ទឹកអស់ចំនួន០៧ឡាន ស្មើរនឹង២៨ម៉ែត្រគូប និងរថយន្តជំនួយមកពីក្រុមហ៊ុន ស្រាបៀរកម្ពុជាចំនួន០១គ្រឿង ប្រើប្រាស់ទឹកអស់០១ឡាន ស្មើរនឹង០៦មែត្រគូប។

លោកវរសេនីយ៍ឯក​ ព្រហ្ម​ យ៉ន​ បានបន្តទៀតថា​ ចំពោះមូលហេតុខាងលើគឺបណ្តាលមកពីការឆ្លងកម្តៅចេញពីឡដុតចំហាយ បង្កជាអគ្គិភ័យ ហើយអគ្គិភ័យនេះធ្វើឲ្យខូចខាតសំយាបដំបូលដែកប្រកស័ង្កសី ទំហំ (៥ម៉ែត្រ x ២០ម៉ែត្រ) អស់មួយចំហៀង រួមទាំងម៉ូតូចំនួន ៣០គ្រឿង និងឡដុតចំហាយចំនួន០១ឡ និងពុំបានឆេះរាលដាលដល់ផ្ទះអ្នកជិតខាងឡើយ៕ មេសា+វិចិត្រ