ខេត្តតាកែវ ៖ ដោយមានការចង្អុលបង្ហាញពីលោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ និងមានការសម្របសម្រួលពីឯកឧត្ដម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅវេលាម៉ោង ៣និង៣០នាទីរសៀល ថ្ងៃទី០៥ ខែមករា ឆ្នាំ២០២៤ នៅលើដងផ្លូវ១២៣​ ស្ថិតក្នុងភូមិធម្មវិន័យ ឃុំស្នោ ស្រុកព្រៃកប្បាស ខេត្តតាកែវ មានករណី អំពើលួច (ឆក់ទូរស័ព្ទ) កើតឡើង បង្កដោយជនសង្ស័យចំនួន០៣នាក់​។

សមត្ថកិច្ចបានឲ្យដឹងថា ជនសង្ស័យទាំង៣នាក់ខាងលើ រួមមាន ៖

១/ឈ្មោះ ធឿន​ ថន​ ហៅខន​ ចន្ថា​ ហៅ២៣ ភេទប្រុស អាយុ៣៣ឆ្នាំ មុខរបរមិនពិតប្រាកដ រស់នៅភូមិតាគល់ ឃុំក្រាំងយ៉ូវ ស្រុកស្អាង ខេត្តកណ្តាល​ (មុខសញ្ញាធ្លាប់ជាប់ពន្ធនាគារ​ និងមានដីកាចាប់ខ្លួនរបស់សាលាដំបូងខេត្តកណ្តាល)​

២/ឈ្មោះ​ ទី​ មុន្នី​ ហៅង៉ោល​ ភេទប្រុស​ អាយុ២៣ឆ្នាំ​ មុខរបរមិនពិតប្រាកដ​ រស់នៅភូមិអំពិល​ ឃុំក្រាំងយ៉ូវ​ ស្រុកស្អាង​ ខេត្តកណ្តាល​

៣/ឈ្មោះ​ ជឺ​ ម៉េងហ៊ុយ​ ហៅតុត ភេទប្រុស​ អាយុ២៤ឆ្នាំ​ មុខរបរមិនពិតប្រាកដ ជិះម៉ូតូមួយគ្រឿងម៉ាកហុងដាឌ្រីម សេ១២៥​ ពណ៌ខ្មៅ ពាក់ផ្លាកលេខ កំពត1F-0382 បានធ្វើសកម្មភាពឆក់ទូរស័ព្ទម៉ាកOPPO ពណ៌ខៀវ​ របស់ឈ្មោះ​ ឈាង​ រតនា​ ភេទស្រី​ អាយុ២៥ឆ្នាំ​ មុខរបរកសិករ​ រស់នៅភូមិទង្គែ​ ឃុំស្នោ​ ស្រុកព្រៃកប្បាស​ ខេត្តតាកែវ ខណៈពេលដែលជនរងគ្រោះកំពុងជិះម៉ូតូតាមដងផ្លូវហើយទុកទូរស័ព្ទក្នុងហោប៉ៅខោ​ (ខោខូវប៊យ)​។

ក្រោយទទួលបានបណ្តឹង លោកវរសេនីយ៍ឯក ឡេង ប៊ុនឡុង បានដឹកនាំបញ្ជាកម្លាំងជំនាញរបស់អធិការនគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាល និងកម្លាំងប្រជាការពារ​ ព័ទ្ធស្ទាក់ឃាត់បានជនសង្ស័យទាំង០៣នាក់ខាងលើ​ ជាមួយវត្ថុតាងរួមមាន៖​ ម៉ូតូ០១គ្រឿង​ (ម៉ូតូធ្វើសកម្មភាព)​ និងទូរស័ព្ទរបស់ជនរងគ្រោះ​ យកមកអធិការដ្ឋាននគរបាលស្រុកព្រៃកប្បាស ដើម្បីសាកសួរ និងកសាងសំណុំរឿងតាមនីតិវិធី ៕