រាជធានីភ្នំពេញ ៖ អគ្គិភ័យមួយបានឆាបឆេះការដ្ឋានភូមិគ្រឹះ កំពុងសាងសង់មួយកន្លែង សន្ធោសន្ធៅ បង្កការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ចពន្លត់អគ្គិភ័យ ចុះទៅអន្តរាគមន៍បាញ់ពន្លត់ ។

ហេតុការណ៍នេះបានកើតឡើងនៅម៉ោង ៨និង២០នាទីព្រឹក ថ្ងៃសៅរ៍ថ្ងៃទី០៦ ខែមករា ឆ្នាំ២០២៤ ចំណុចការដ្ឋានកំពុងសាងសង់ ស្ថិតនៅដីឡូលេខ ១៧៥ ផ្លូវ២០១ កែងផ្លូវ ២៩៦ ភូមិ២ សង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ។

លោកវសេនីយ៍ឯក ព្រហ្ម យ៉ន នាយការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា អគ្គិភ័យនេះបានឆេះ បន្ទប់ជាន់ក្រោម ទំហំ ០៤ម៉ែត្រx០៤ម៉ែត្រ ហើយពុំបានឆេះរាលដាលដល់អ្នកក្បែរខាងឡើយ ។ ចំណែកមូលហេតុបណ្តាលមកពី កាត់ដែកធ្លាក់កម្ទេចភើ្លងបង្ករជាអគិ្គភ័យ។

ភ្លាមៗ រថយន្តការិយាល័យ​អគ្គីភ័យ :​ ចំនួន ១២គ្រឿង បានចុះមកអន្តរាគមន៍ ដោយប្រើប្រាស់ទឹកអស់ចំនួន ០៥ឡាន ស្មើរនឹង ២០ម៉ែត្រគូប ។ រថយន្តជំនួយអន្តរាគមន៍ពីក្រសួងមហាផ្ទៃចំនួន ០១គ្រឿងប្រើប្រាស់ទឹកអស់ចំនួន ០១ឡាន ស្មើនឹង ០៤មែត្រគូប, រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់អស់ចំនួន ០១ឡានស្មើនឹង ០៦ម៉ែត្រគូប ទើបរលត់ទៅវិញ នៅម៉ោង ០៩និង១៥នាទីព្រឹក នាថ្ងៃខែ ឆ្នាំដដែល ៕ អែល វិចិត្រ